Forcat ruse goditën një tjetër ndërtesë për prodhimin e gazit në lindje të Ukrainës mëngjesin e 16 tetorit, duke shkaktuar ndërprerjen e prodhimit dhe duke shtuar presionin mbi rrjetin energjetik. Që nga fillimi i pushtimit të plotë të Ukrainës në vitin 2022, Moska ka sulmuar infrastrukturën ukrainase çdo dimër, duke e detyruar Kievin të aplikojë reduktime të energjisë elektrike dhe të importojë energji.
“Si rezultat i sulmit, ndërtesat për prodhimin e gazit në rajonin e Poltavës janë mbyllur”, tha DTEK, shpërndarësi më i madh privat i energjisë elektrike në Ukrainë.
Presidenti ukrainas, Volodymyr Zelensky, tha se Rusia gjatë natës ka lëshuar mbi 300 dronë, përfshirë edhe disa që bartnin municione thërrmuese, si dhe 37 raketa. “Këtë vjeshtë, rusët çdo ditë po e shfrytëzojnë për të sulmuar infrastrukturën tonë të energjisë”, tha ai.
Operatori ukrainas i rrjetit energjetik njoftoi për ndërprerje emergjente të energjisë elektrike në tetë rajone pas sulmeve të së enjtes. Raportimet e mëparshme të mediave sugjeruan se rreth 60% e prodhimit të gazit në Ukrainë është ndërprerë për shkak të sulmeve të fundit ruse, ndërsa sulmet ndaj centraleve elektrike kanë lënë pa energji qindra mijëra persona në Ukrainë.
Sulmi i 16 tetorit vjen një ditë pasi kompania shtetërore e energjisë, Naftogaz, tha se një nga centralet termike ishte dëmtuar gjatë një sulmi të mëparshëm rus në Harkiv, Sumi dhe Çernihiv.
Kremlini pretendon se forcat e tij sulmojnë vetëm objekte ushtarake. Gjykata Ndërkombëtare Penale vitin e kaluar lëshoi një fletarrestim ndaj dy oficerëve të lartë rusë lidhur me sulmet ndaj infrastrukturës energjetike të Ukrainës, duke thënë se këto sulme përbëjnë “krime lufte” dhe kishin shkaktuar dëme “të mëdha” ndaj civilëve.
Kievi u ka bërë thirrje aleatëve të tij që t’i japin më shumë sisteme të mbrojtjes ajrore për të mbrojtur infrastrukturën kritike, por edhe për të kryer sulme hakmarrëse ndaj rafinerive të naftës në Rusi.