Tabaku: Qeveria krijon shifra false, ndërsa 55% e shqiptarëve nuk e mbyllin dot muajin
Deputetja e Partisë Demokratike, Jorida Tabaku, ka reaguar fuqishëm ndaj deklaratave të qeverisë lidhur me gjendjen ekonomike të vendit, duke theksuar se propaganda zyrtare bie ndesh tërësisht me realitetin e përditshëm të qytetarëve shqiptarë.
“Qeveria, e cila gjithë ditën merret me krijimin e shifrave false dhe me propagandë, sot ankohet pse i referohemi shifrave të Eurostatit,” u shpreh Tabaku, duke nënvizuar se raporti i Eurostatit përbën një fakt të qartë që ngre një shqetësim real për kushtet e jetesës së shqiptarëve.
Sipas saj, të dhënat tregojnë se 55% e shqiptarëve nuk e mbyllin dot muajin, ndërsa ekonomia familjare është e goditur nga disa faktorë:
- Të ardhurat në rënie
- Taksat e rritura
- Rritja e çmimeve të produkteve bazë
“Sot, 40% e buxhetit familjar shkon vetëm për ushqim,” theksoi ajo.
Deputetja opozitare shtoi se rënia e remitancave, si pasojë e zhvlerësimit të euros me rreth 30%, dhe inflacioni i lartë në sektorin e ushqimeve, që gjithashtu ka arritur 30%, kanë përkeqësuar ndjeshëm mirëqenien e qytetarëve.
“Është fakt: shqiptarët sot janë më të varfër. Shqipëria sot është më e varfër, sepse është e vjedhur,” deklaroi Tabaku, duke akuzuar qeverinë se ka humbur lidhjen me realitetin dhe po jeton në botën e propagandës.