Dy operatorë ekonomikë ankimojnë tenderin 3.9 milionë euro të OBP për sistemet e Doganave
Një tender me vlerë rreth 3.9 milionë euro, i cili synon modernizimin e infrastrukturës IT të Doganave, është ankimuar së fundmi në Komisionin e Prokurimit Publik nga dy operatorë ekonomikë.
Procedura e prokurimit u hap më 4 qershor nga Operatori i Blerjeve të Përqendruara (OBP), me një fond limit prej 387 milionë lekësh (rreth 3.9 milionë euro). Objektivi kryesor i këtij tenderi është përmirësimi i infrastrukturës hardware të sistemeve doganore dhe rrjeteve fizike.
Arsyet e ankimimit, sipas klasifikimit, lidhen me dokumentet e tenderit. Ankimimet në këtë fazë të procedurave zakonisht adresohen në lidhje me kushtet e pjesëmarrjes, specifikimet teknike ose kritere të tjera të përcaktuara në dokumentacionin e garës.
Projekti
Sipas dokumenteve të tenderit, projekti parashikon zëvendësimin e serverëve, sistemeve të ruajtjes së të dhënave dhe pajisjeve të rrjetit që janë amortizuar ose nuk marrin më mbështetje nga prodhuesit. Ky investim do të prekë sistemet kryesore të Doganave, duke përfshirë:
- Asycuda World
- LIMS
- SEED
- AlphaWeb
- Dhe platforma të tjera që përdoren për operacionet doganore dhe tarifore.
Paketa e pajisjeve dhe software-ve përfshin:
- 16 serverë virtualizimi
- Dy sisteme storage
- Katër SAN switch-e
- Pajisje backup
- Software virtualizimi dhe backup-i
- Firewall-e qendrore dhe për degët doganore
- Switch-e qendrore
- Platformë për analizimin e log-eve
- Load balancer.
Kontrata gjithashtu parashikon ngritjen e një infrastrukture me dy site, një primar dhe një sekondar, për të garantuar vazhdimësinë e shërbimit dhe rikuperimin në rast incidentesh.
Tenderi përfshin gjithashtu elementë për forcimin e sigurisë kibernetike dhe përmirësimin e komunikimit mes qendrës dhe degëve doganore, duke përdorur arkitekturën SD-WAN, firewall-e të avancuara dhe monitorim të centralizuar të ngjarjeve të sigurisë.
Sipas dokumentacionit, projekti lidhet edhe me nevojën për të mbështetur sisteme të reja si NCTS dhe NSW, të cilat pritet të rrisin volumin e të dhënave dhe kërkesat për kapacitete procesuese.
Afati i zbatimit të projektit është 12 muaj, ndërsa mirëmbajtja pas implementimit do të zgjasë 24 muaj.