OBP shpall tender me vlerë 1.2 milionë euro për furnizimin me karburant të institucioneve shtetërore
Operatori i Blerjeve të Përqendruara (OBP) ka hapur së fundmi një tender me fond limit rreth 1.19 milionë euro pa TVSH, destinuar për furnizimin me karburant të disa institucioneve publike. Vlera totale e kontratës arrin në 111.7 milionë lekë dhe tenderi është ndarë në dy lote.
Loti i parë ka një fond limit prej 91.7 milionë lekë (rreth 979,700 euro pa TVSH) dhe përfshin furnizimin me gazoil 10 ppm. Ky lot mbulon kërkesat e tetë institucioneve, mes të cilave përmenden Garda e Republikës, Autoriteti Rrugor Shqiptar, Agjencia e Ekzekutimit të Vendimeve Penale dhe Njësia Vendore e Kujdesit Shëndetësor Tiranë. Furnizimi do të kryhet kryesisht nëpërmjet kartave elektronike në pikat e karburantit të operatorit fitues. Për Degën e Doganës Pogradec, dokumentacioni parashikon gjithashtu furnizim me autobot në magazinën e Doganës së Qafë Thanës.
Loti i dytë ka një fond limit rreth 20 milionë lekë (afërsisht 213,800 euro pa TVSH). Përfitues të këtij loti janë Garda e Republikës, Drejtoria e Rajonit Jugor Gjirokastër, Qendra e Transferimit të Teknologjive Bujqësore Vlorë, Agjencia e Ekzekutimit të Vendimeve Penale dhe Drejtoria e Përgjithshme e Përmbarimit. Edhe në këtë rast, karburanti do të sigurohet me anë të kartave elektronike pranë rrjetit të stacioneve të kompanisë fituese.
Kontrata do të zbatohet në përputhje me nevojat specifike të institucioneve përfituese dhe kushtet e përcaktuara në dokumentet e tenderit.
OBP ka qenë funksional që nga marsi i vitit 2024 si një entitet përgjegjës për zhvillimin e procedurave të blerjeve për institucionet e ndryshme, kur vlerat e tyre tejkalojnë 1 milionë lekë pa TVSH. Si pjesë e shërbimit që ofron, OBP përfiton të ardhura nga këto procedura dhe konsulencë. Kategoritë kryesore të tenderëve që administrohen nga OBP përfshijnë blerjen e automjeteve, karburantit, materialeve të kancelarisë, orendive dhe pajisjeve mobiluese, materialeve të pastrimit, uniformave dhe elementëve të tyre, këpucëve, si dhe pjesëve të këmbimit, por nuk kufizohet vetëm në këto.