Rama: Nuk do ta zgjasim ndalimin 1-vjeçar të TikTok, kemi arritur partneritet dhe masat do të bëhen publike
Kryeministri Edi Rama ka bërë të ditur se Shqipëria nuk do të zgjasë ndalimin 1-vjeçar të rrjetit social TikTok. Në një intervistë, kreu i qeverisë theksoi se është arritur një partneritet me platformën dhe së shpejti do të prezantohen masat e reja mbrojtëse për publikun shqiptar.
“Jemi të kënaqur me rezultatin. Kemi bërë partneritetin dhe shpresoj që në javët ose muajt në vijim do t’ia zbulojmë planin popullit shqiptar, siç e premtuam”, ka thënë kryeministri. Ai shtoi se ishte shumë i befasuar nga reagimi i TikTok pas vendimit fillestar të Shqipërisë për të ndaluar platformën, pasi në fillim priste rezistencë, por në vend të kësaj, ata kanë treguar gatishmëri për bashkëpunim.
“I takova vetë dhe mbeta shumë i impresionuar nga qëndrimi i tyre. Ata po i dëgjonin me shumë kujdes pikat tona”, tha Rama nga margjinat e Samitit BE-Ballkani Perëndimor. Ai pranoi se ndalimi nuk e ka zgjidhur plotësisht dhunën në shkolla, por ka ndihmuar në vendosjen e mekanizmave të rinj mbrojtës me TikTok.
Kryeministri përjashtoi mundësinë që Shqipëria të mbështesë kufizime të përgjithshme të mediave sociale për të miturit, duke i cilësuar ato joefektive. Ai riafirmoi synimin për anëtarësim në BE në vitin 2030.
“Këto janë budallallëqe. Kjo është diçka që Shqipëria nuk do ta marrë në konsideratë. Nuk funksionon”, tha ai, duke pranuar se qeveria e tij e ka shqyrtuar, por pa një zbulim të plotë të atyre që fshihen pas veprimeve online, Shqipëria do të jetë gjithmonë nën rrezikun e sulmeve nga trollët dhe robotët.
Qeveria vendosi ndalimin e TikTok në mars të vitit 2025, pas rreth një viti bisedimesh me platformën mbi abuzimin online. Ngjarja e dhunshme jashtë një shkolle në Tiranë ishte pika kulmore, pas së cilës qeveria urdhëroi ofruesit e shërbimeve të internetit të bllokojnë aksesin në platformë. Ky veprim shkaktoi reagime të forta nga partitë opozitare dhe organizatat joqeveritare, të cilat akuzuan qeverinë për censurë dhe kufizim të lirisë së shprehjes në internet.