Tragjedi në brigjet e Turqisë: 14 emigrantë humbin jetën nga përmbysja e një gomoneje
Një tragjedi ka ndodhur në Detin Egje, pranë brigjeve jugperëndimore të Turqisë, ku një gomone që transportonte emigrantë u përmbys të premten, duke shkaktuar vdekjen e të paktën 14 personave. Autoritetet turke konfirmuan se në bord ishin 18 emigrantë.
Dy persona kanë mbijetuar, mes tyre një shtetas afgan. Përpjekjet për kërkim-shpëtim janë duke vazhduar për dy persona të tjerë, të cilët ende rezultojnë të zhdukur.
Sipas një deklarate nga zyra e guvernatorit rajonal, barka filloi të merrte ujë menjëherë pas nisjes nga Bodrumi, një qytet bregdetar i njohur për turistët në provincën Muğla. Një nga të mbijetuarit arriti të notonte për gjashtë orë për të mbërritur në breg, ndërsa tjetri u gjet në një ishull aty pranë.
Për gjetjen e emigrantëve të zhdukur janë angazhuar katër anije të rojes bregdetare, një ekip zhytjeje dhe një helikopter.
Nuk është bërë e qartë nëse emigrantët po përpiqeshin të arrinin në ishullin grek të Kos, i cili ndodhet afër Bodrumit. Greqia shërben si një pikë kryesore hyrëse në Bashkimin Evropian për personat që ikin nga konfliktet dhe varfëria në Lindjen e Mesme, Afrikë dhe Azi. Shumë prej tyre zgjedhin udhëtimin e shkurtër por të rrezikshëm nga bregu i Turqisë drejt ishujve grekë, duke përdorur gomone ose varka të vogla, shpesh në kushte të vështira. Aksidentet fatale janë të zakonshme.
Vetëm këtë javë, autoritetet turke arrestuan 169 persona, shumica shtetas të huaj, të dyshuar për trafikim emigrantësh, si pjesë e një operacioni mbarëkombëtar, sipas Ministrisë së Brendshme.