Tragjedi në Itali: Nëna hidhet nga kati i tretë me tre fëmijët
Një ngjarje e rëndë ka ndodhur në Catanzaro, ku një nënë 46-vjeçare ka kërcyer nga dritarja e banesës së saj në katin e tretë, duke marrë me vete edhe tre fëmijët e saj.
Sipas autoriteteve italiane, gruaja dhe dy nga fëmijët – një djalë 4-vjeçar dhe një foshnjë 4-muajshe – kanë humbur jetën në vendngjarje. Vajza tjetër, 5-vjeçare, është transportuar urgjentisht në spital dhe ndodhet në gjendje kritike në repartin e kujdesit intensiv.
Ngjarja ka ndodhur në një apartament në Via Zanotti Bianco, ku familja jetonte prej kohësh. Megjithëse motivet e kësaj tragjedie nuk janë ende plotësisht të qarta, mediat lokale raportojnë se gruaja kishte shfaqur më parë probleme të lehta të shëndetit mendor.
Fqinjët e kanë përshkruar atë si një person të qetë, të rezervuar dhe të përkushtuar ndaj praktikave fetare, duke e bërë ngjarjen edhe më të vështirë për t’u kuptuar nga komuniteti.
Në momentin e ngjarjes, bashkëshorti ndodhej gjithashtu në banesë. Sipas raportimeve, ai është zgjuar nga zhurmat dhe ka dalë menjëherë jashtë, duke u përpjekur të ndihmojë fëmijët përpara mbërritjes së shërbimeve të emergjencës.
Autoritetet italiane po vijojnë hetimet për të zbardhur rrethanat e plota të kësaj tragjedie familjare.