Tragjedi në Mesdhe: Anije me emigrantë mbytet në brigjet e Tunizisë, 40 viktima
Një tragjedi e rëndë ka ndodhur në Mesdhe, ku një anije e mbingarkuar me emigrantë nga Afrika nën-sahariane, përfshirë disa foshnje, u mbyt në brigjet e Salakta, në juglindje të qytetit Mahdia. Sipas raportimeve të agjencisë ANSA, rreth 40 persona humbën jetën në këtë aksident.
Më shumë se 30 emigrantë të tjerë arritën të shpëtoheshin nga njësitë e rojes bregdetare. Kjo ngjarje vjen vetëm një javë pas një tjetër tragjedie, ku mbytja e një anijeje mes Maltës dhe Lampeduzës rezultoi në vdekjen e 23 personave.
Varka e vogël, e përbërë prej hekuri, mendohet të ketë pasur në bord rreth 70 persona. Të gjithë pasagjerët ishin emigrantë, të cilët po kërkonin një mundësi për t’u larguar nga Tunizia, duke parë në këto udhëtime të rrezikshme shpresën e vetme për një jetë më të mirë.
Zyra e prokurorisë ka hapur një hetim për të zbardhur shkaqet e kësaj tragjedie. Megjithatë, deri më tani nuk janë dhënë informacione zyrtare në lidhje me shkakun e përmbysjes së anijes apo detaje të mëtejshme rreth operacioneve të shpëtimit të kryera nga Garda Kombëtare.