Alarm për tregun e energjisë! Irani u kërkon rebelëve Houthi të përgatiten për mbylljen e Detit të Kuq
Zinxhiri global i energjisë po përballet me një kërcënim të ri, pas tensioneve të shtuara në Lindjen e Mesme. Sipas raportimeve, Irani u ka kërkuar rebelëve Huthi në Jemen të jenë të gatshëm për mbylljen e korridorit kryesor të transportit detar të naftës në Detin e Kuq, në rastin e një sulmi amerikan ndaj infrastrukturës energjetike iraniane.
Ky plan, sipas burimeve të cituara nga Reuters, është diskutuar në udhëheqjen supreme të Iranit dhe mesazhi i është përcjellë Huthëve nga aleatë të afërt të Teheranit. Dy zyrtarë të lartë iranianë dhe një burim rajonal, të informuar mbi çështjen, kanë konfirmuar se kërkesa është komunikuar së fundmi, por pa dhënë detaje mbi mënyrën e transmetimit.
Një burim pranë Huthëve ka deklaruar se grupi ka finalizuar përgatitjet për sulme ndaj anijeve, duke vendosur raketa dhe dronë strategjikisht pranë Ngushticës Bab el-Mandab, hyrja kyçe në Detin e Kuq. Këto pozicione janë vendosur në zona malore me pamje nga Hodeida dhe Gjiri i Adenit, duke pritur urdhra për të nisur operacionet.
Një ndërprerje e trafikut detar në Detin e Kuq do të kishte pasoja të rënda për tregjet globale të energjisë, veçanërisht nëse kjo situatë do të shoqërohej me bllokimin e Ngushticës së Hormuzit, një tjetër rrugë jetike për eksportet e naftës nga Lindja e Mesme. Ekspertët paralajmërojnë se mbyllja e këtyre dy korridoreve do të shkaktonte një krizë të re në furnizimet globale, duke kufizuar transportin e naftës, duke rritur kostot e sigurimit dhe duke ushtruar presion mbi çmimet.
Një burim rajonal sugjeron se përfaqësues të Gardës Revolucionare Islamike të Iranit, tashmë të pranishëm në Jemen, mund të kenë një rol vendimtar në aktivizimin e operacioneve në Bab el-Mandab.
Tensionet në rajon janë përshkallëzuar më tej, pasi Huthitët kanë ndërmarrë sulme me raketa drejt Arabisë Saudite, duke pretenduar se ky veprim ishte reagim ndaj një sulmi ndaj një aeroporti të kontrolluar prej tyre. Ky zhvillim ka nxitur shqetësime për rikthimin e përplasjeve mes grupit jemenas dhe Riadit.
Torbjorn Soltvedt, analist i Lindjes së Mesme pranë firmës së analizës së riskut Verisk Maplecroft, thekson se çdo përshkallëzim që prek infrastrukturën energjetike dhe transportin detar në Detin e Kuq do të përbënte një kërcënim serioz për eksportet e naftës nga rajoni.
Çmimet e naftës reagojnë ndaj tensioneve
Menjëherë pas raportimeve për përshkallëzimin e situatës, çmimet e naftës kanë shënuar rritje. Nafta Brent u ngrit me më shumë se 1%, duke arritur rreth 85.88 dollarë për fuçi, ndërsa nafta amerikane WTI u rrit në rreth 80.49 dollarë për fuçi.
Ekspertët e tregjeve financiare vlerësojnë se një krizë e njëkohshme në Ngushticën e Hormuzit dhe në Bab el-Mandab do të rëndonte ndjeshëm zinxhirin global të furnizimit me energji dhe do të rriste kostot e transportit detar.
Deti i Kuq konsiderohet një nga korridoret më të rëndësishme të tregtisë globale. Ngushtica Bab el-Mandab lidh Oqeanin Indian me Kanalin e Suezit, duke e bërë atë një pikë strategjike për transportin e naftës dhe mallrave.