Trump publikon mesazhin privat nga Macron: “Nuk e kuptoj çfarë po bën në Groenlandë”
Presidenti i Shteteve të Bashkuara, Donald Trump, ka ndarë atë që ai e ka cilësuar një mesazh privat nga homologu i tij francez, Emmanuel Macron. Trump e publikoi tekstin në llogarinë e tij në Truth Social.
Në mesazh, udhëheqësi francez shpreh konfuzion rreth qëllimeve të Shteteve të Bashkuara për Groenlandën. Ai gjithashtu ofron organizimin e një takimi të G7 në Paris, me pjesëmarrjen e Ukrainës, Danimarkës, Sirisë dhe Rusisë, si dhe kërkon një darkë me presidentin amerikan.
«Nuk e kuptoj çfarë po bën në Groenlandë», thuhet në mesazhin e Macron.
«Le të darkojmë së bashku në Paris të enjten, para se të kthehesh në SHBA», vijon teksti.
Ky publikim vjen pas një debati publik mes Trump dhe Macron lidhur me “Bordin e Paqes në Gaza” të propozuar nga SHBA-të, të cilit Franca nuk pranoi t’i bashkohej.
Bordi, që do të drejtohej nga Trump, kishte për qëllim mbikëqyrjen e tranzicionit në enklavën palestineze të shkatërruar nga lufta. Parisi argumentoi se refuzoi pjesëmarrjen sepse statuti i bordit “shtrihet përtej Gazës dhe për këtë arsye tejkalon fushëveprimin e planit të paqes të miratuar nga Kombet e Bashkuara”.
Në përgjigje, Trump sugjeroi se Macron nuk dëshirohej në këshill, duke theksuar se mandati i tij presidencial po përfundon së shpejti. Ai gjithashtu la të kuptohet se Franca mund të detyrohet të aplikojë tarifa tregtare.
Bordi do të themelohet zyrtarisht me një ceremoni nënshkrimi të statutit në margjinat e Forumit Ekonomik Botëror në Davos, më vonë gjatë kësaj jave.