Historike: Presidenti i Sirisë pritet nga Trump në Shtëpinë e Bardhë
Shtetet e Bashkuara të Amerikës njoftuan sot një pezullim të pjesshëm, për 180 ditë të tjera, të disa prej sanksioneve më të rrepta kundër Sirisë. Ky njoftim erdhi menjëherë pas pritjes së Presidentit sirian Ahmed al-Sharaa në Shtëpinë e Bardhë nga Presidenti amerikan Donald Trump, në një takim historik që sinjalizon një ndryshim të thellë në marrëdhëniet mes dy vendeve.
Vizita e al-Sharaa, e para e një presidenti sirian në Uashington që nga pavarësia e vendit, hap rrugën për Sirinë drejt rimëkëmbjes në arenën ndërkombëtare, pas dekadash izolimi. Al-Sharaa, i cili mori drejtimin e vendit në dhjetor 2024 pas rrëzimit të Bashar al-Assad, vjen nga radhët e rebelëve islamistë dhe tani është bërë një bashkëbisedues me Perëndimin.
Mbërritja e tij në Shtëpinë e Bardhë ishte e karakterit të kujdesshëm, pa nderimet dhe flamujt kombëtarë që zakonisht shoqërojnë krerët e shteteve.
Sipas Shtëpisë së Bardhë, takimi u fokusua në forcimin e sigurisë dhe përfshirjen e Sirisë në koalicionin e udhëhequr nga SHBA-të kundër Shtetit Islamik. Gjithashtu, në diskutim ishte edhe një pakt i mundshëm sigurie me Izraelin.
Paralelisht, Departamenti i Thesarit i SHBA-së njoftoi një urdhër të ri, duke zgjatur për 6 muaj pezullimin e zbatimit të sanksioneve të të ashtuquajturit “Akti i Cezarit”. Megjithatë, ky përjashtim nuk vlen për transaksionet që përfshijnë qeveritë e Rusisë dhe Iranit, ose produktet, teknologjitë dhe financimet që rrjedhin prej tyre.
Një zyrtar i lartë i administratës Trump theksoi se shfuqizimi i plotë i “Aktit të Cezarit” kërkon një vendim të Kongresit. Presidenti Trump më parë ka hequr shumë nga sanksionet ekzistuese dhe e ka përshkruar Al-Sharaa si një “udhëheqës të fortë që përballet me një zonë të vështirë”.
Bisedimet vijnë vetëm pak ditë pasi emri i al-Sharaa u hoq nga lista e “terroristëve të shpallur globalisht”. Uashingtoni po shqyrton tani mundësinë e krijimit të një pranie ushtarake amerikane në një bazë ajrore pranë Damaskut, ndërsa të dyja palët po diskutojnë mënyra për të stabilizuar Sirinë pas 14 vitesh luftë.
Pak para takimit, autoritetet siriane njoftuan se kishin parandaluar dy atentate kundër al-Sharaa nga grupe të Shtetit Islamik. Gjatë fundjavës, Ministria e Brendshme Siriane nisi një operacion për çmontimin e elementëve kyç të organizatës, duke arrestuar mbi 70 persona të dyshuar.