“`html
Turizmi përshpejtohet në maj, hyrjet e të huajve rriten me rreth 16%
Sektori i turizmit ka shënuar një përshpejtim të ndjeshëm të rritjes gjatë muajit maj. Operatorët turistikë shprehin pritshmëri për shtim të flukseve nga turet kulturore, vizitorët individualë dhe fillimin e turizmit të organizuar veror, sidomos në strukturat akomoduese të Golemit.
Në muajin maj, numri i hyrjeve të shtetasve të huaj u rrit me 15.86%, ndërsa për pesëmujorin e parë të vitit rritja arriti në 8.2%.
Sipas të dhënave të INSTAT për lëvizjen e shtetasve, në maj 2026, në territorin e Republikës së Shqipërisë kanë hyrë gjithsej 1,880,161 shtetas shqiptarë dhe të huaj. Ky tregues shënoi një rritje prej 12.2% krahasuar me majin e vitit 2025. Në të njëjtën periudhë, nga territori shqiptar kanë dalë 1,802,626 shtetas shqiptarë dhe të huaj, duke regjistruar një rritje prej 8.9% krahasuar me një vit më parë.
Detajimi i hyrjeve dhe daljeve:
- Hyrjet në Shqipëri:
- Shtetas shqiptarë: 736,566 (rritje me 6.9%)
- Shtetas të huaj: 1,143,595 (rritje me 15.9%)
- Daljet nga Shqipëria:
- Shtetas shqiptarë: 735,795 (rritje me 3.6%)
- Shtetas të huaj: 1,066,831 (rritje me 12.9%)
Rajonet nga ku vijnë shtetasit e huaj:
- Evropa Jugore kontribuon me 70% të hyrjeve nga Evropa.
- Evropa Perëndimore kontribuon me 12% të hyrjeve nga Evropa.
Qëllimi kryesor i hyrjes së shtetasve të huaj në Shqipëri, në 98% të rasteve, është për qëllime personale. Në maj 2026, ky tregues pati një rritje prej 16.4% krahasuar me majin e vitit 2025. Megjithatë, hyrjet e shtetasve të huaj për qëllime biznesi dhe profesionale kanë shënuar një rënie prej 5.6%.
Pritshmëritë e sektorit
Pritshmëritë për këtë vit mbeten optimiste, me sektorin që parashikon vijimin e një rritjeje të qëndrueshme, të ngjashme me vitin e kaluar. Fillimi i vitit u karakterizua nga një ecuri më e ngadaltë, ndikuar nga kushtet e motit, ndërsa marsi shënoi rikthimin e rritjes në nivele dyshifrore.
Vera pritet të ketë një ecuri pozitive, duke u referuar edhe kontratave me garanci, të cilat konsiderohen si sinjali i parë i vlerësimit dhe kanë rezultuar në rritje.
Një kontribut pozitiv pritet edhe nga zhvendosja e një pjese të kërkesës drejt Shqipërisë, si pasojë e konfliktit në Lindjen e Mesme, i cili ndikoi te vizitorët e momentit të fundit që anuluan udhëtimet drejt destinacioneve pranë zonave të luftës.
Pavarrësisht pritshmërive pozitive, turoperatorët theksojnë se sfidat kryesore të sektorit këtë vit do të mbeten infrastruktura, cilësia e shërbimit dhe një qasje më e matur e hotelerisë dhe restoranteve ndaj çmimeve. Në vitet e fundit, Shqipëria ka humbur një pjesë të avantazhit si destinacion i lirë, duke iu afruar niveleve të çmimeve të Greqisë, e cila së fundmi ka qenë më agresive me paketat turistike.
“`