Turqia dhe Koreja e Jugut nënshkruajnë memorandum bashkëpunimi për energjinë bërthamore
Turqia dhe Koreja e Jugut kanë nënshkruar sot një memorandum bashkëpunimi në fushën e energjisë bërthamore. Marrëveshja u finalizua gjatë vizitës zyrtare në Ankara të presidentit jugkorean Lee Jae-myung dhe takimit të tij me homologun turk Recep Tayyip Erdogan.
Sipas njoftimit të Ministrisë turke të Energjisë, ky memorandum synon shkëmbimin e ndërsjellë të të dhënave teknike, informacioneve, përvojës dhe njohurive (know-how), si dhe realizimin e projekteve të përbashkëta.
Memorandumin e nënshkruan, në prani të presidentëve Erdoğan dhe Lee, drejtorët ekzekutivë të kompanisë turke të energjisë bërthamore TUNAŞ, Necati Yılmaz, dhe të asaj koreanojugore KEPCO, Dong-cheol Kim.
Deklarata e Ministrit të Energjisë
Ministri turk i Energjisë, Alparslan Bayraktar, në një postim në rrjetet sociale, theksoi se kjo marrëveshje do të mundësojë bashkëpunim në disa fusha kyçe.
Ndër këto fusha përfshihen:
- Zhvillimi i projekteve të termocentraleve bërthamore.
- Shkëmbimi i teknologjisë dhe ekspertizës.
- Vlerësimi i zonave të përshtatshme për projekte.
- Financimi i projekteve.
- Zhvillimi i burimeve njerëzore.
Ministri Bayraktar shprehu shpresën se kjo marrëveshje, e cila pritet të kurorëzohet me një partneritet strategjik në energjinë bërthamore, do t’u sjellë dobi të dyja vendeve.