Çmimi i naftës me pakicë zbret në 214 lekë për litër, duke shënuar një ulje prej 5 lekësh
Nafta me pakicë është tregtuar sot në pikat e karburantit me një çmim maksimal prej 214 lekësh për litër. Sipas një vëzhgimi të kryer në terren, operatori i pakicës “Veliaj” ka ofruar naftë me çmim 211 lekë për litër, ndërsa operatori “Gega Oil” e ka tregtuar atë me 214 lekë për litër.
Krahasuar me ditën e djeshme, çmimi i naftës ka pësuar një ulje prej 5 lekësh për litër. Pas një periudhe stabilizimi, çmimet e naftës në tregun e pakicës filluan të rriteshin sërish nga mesi i korrikut. Gjatë kësaj periudhe, nafta arriti nivele prej 198 lekësh për litër, nga 188 lekësh që tregtohej më parë. Brenda shtatë ditësh, çmimi i naftës u rrit edhe me 8 lekë të tjera, duke shkuar në 206 lekë për litër.
Ndryshe nga nafta, çmimi i benzinës ka mbetur i pandryshuar, duke vijuar të tregtohet me 189 lekë për litër.
Rikthimi i shtrenjtimit të naftës në tregun vendas u ndikua nga përshkallëzimi i konfliktit në Lindjen e Mesme, i cili shkaktoi një rritje të ndjeshme të çmimit të naftës në bursat ndërkombëtare. Përshkallëzimi i sulmeve solli bllokime për kalimin e anijeve në Kanalin e Hormuzit, një zonë kyçe ku kalon rreth 3/5 e prodhimit botëror të naftës. Gjatë kësaj periudhe, çmimi i naftës “brent crude” arriti kulmin më 23 korrik, duke shkuar në 100 USD për fuçi.
Aktualisht, në bursa, çmimi i naftës ka rënë në 83 USD për fuçi, nga 90 USD për fuçi që ishte më 29 korrik.
Burimi: Tregu, Bodi i transparencës