Bota e arteve marciale është në zi! Kampioni botëror i MMA-së, vetëm 15 vjeç, Mukhamedali Sanduloev, u vra me thikë në zemër në Taxhikistan.
Federata Ndërkombëtare e Arteve Marciale të Përziera (IMMAF) njoftoi vdekjen tragjike të talentit të ri. Ngjarja e rëndë ndodhi në një internet-kafe në qytetin Kulob, ku sportisti u përfshi në një sherr me bashkëmoshatarë.
Gjatë përleshjes, Sanduloev dyshohet të jetë goditur me thikë në gjoks, duke pësuar plagë fatale. Pavarësisht ndërhyrjes së shpejtë, 15-vjeçari nuk arriti t’u mbijetojë dëmtimeve.
Në të njëjtin incident, dy persona të tjerë u plagosën dhe u dërguan në spital për trajtim mjekësor.
Autoritetet lokale kanë nisur hetimet për zbardhjen e plotë të rrethanave të ngjarjes dhe identifikimin e personave përgjegjës. Policia e Taxhikistanit ka kryer dy arrestime lidhur me vrasjen.
Komuniteti ndërkombëtar i MMA-së shprehu pikëllim dhe tronditje për humbjen e njërit prej premtimeve më të mëdha të sportit. Mukhamedali Sanduloev kishte fituar medaljen e artë në Kampionatin Botëror për të Rinj IMMAF 2024, duke përfaqësuar Taxhikistanin.
IMMAF i shprehu ngushëllimet familjes, miqve dhe Federatës Kombëtare të MMA-së së Taxhikistanit, duke e cilësuar humbjen si një goditje të rëndë për sportin dhe një tragjedi të madhe për komunitetin global të MMA-së.