Temperaturat e larta shkaktojnë numër rekord viktimash në Spanjë: të paktën 100 të vdekur vetëm në maj
Spanja po përballet me numrin më të lartë të viktimave të regjistruara si pasojë e temperaturave të larta. Sipas të dhënave të Ministrisë së Shëndetësisë, muaji maj shënoi shifrën më të lartë të vdekjeve të lidhura me nxehtësinë që nga viti 2015, me të paktën 101 persona që humbën jetën.
Kjo shifër është 3.6 herë më e lartë se numri mesatar i vdekjeve të lidhura me nxehtësinë të regjistruara në muajin maj gjatë dekadës së fundit.
Rekordet e temperaturave për muajin maj janë thyer në disa qytete spanjolle ditët e fundit, veçanërisht në veri. Agjencia Kombëtare Meteorologjike (Aemet) i ka përshkruar këto temperatura si “jashtëzakonisht të larta për majin” dhe ka theksuar “këmbënguljen” e kësaj vale të nxehtë, e cila ka zgjatur disa ditë.