Hetimet për vjedhje milionash lekësh nga pensionet në Bilisht
Në Bilisht, dy punonjëse të postës janë vënë nën hetim penal për dyshimin e përvetësimit të miliona lekëve nga fondet e pensioneve dhe ndihmës ekonomike. Dyshimet janë se, për disa muaj, ato kanë falsifikuar dokumente dhe kanë manipuluar të dhëna financiare për të përfituar kundrejt ligjshmërisë.
Hetimet kanë filluar pas verifikimeve të kryera nga Policia e Korçës, të cilat kanë zbuluar një skemë abuzimi me paratë e përfituesve, kryesisht pensionistë që banojnë jashtë vendit.
Specialistët e Seksionit për Hetimin e Krimeve Ekonomike dhe Financiare i kanë referuar materialet Prokurorisë, e cila ka nisur procedimin penal për veprat penale të mëposhtme:
- “Vjedhja e kryer duke shpërdoruar detyrën”
- “Falsifikimi i dokumenteve”
- “Falsifikimi kompjuterik”
Këto vepra penale dyshohet se janë kryer në bashkëpunim nga dy shtetase:
- P. Sh., 29 vjeçe, banuese në Bilisht, përgjegjëse e zyrës postare Vishocicë, Devoll.
- E. Ç., 27 vjeçe, banuese në Bilisht, arkëtare-llogaritare në degën postare Devoll.
Sipas hetimit, këto shtetase dyshohet se, duke bashkëpunuar, gjatë periudhës shtator 2025 – janar 2026, kanë vjedhur rreth 22.000.000 lekë të rinj nga fondi i postës, duke shpërdoruar detyrat e tyre. Shtetasja P. Sh. dyshohet se ka përvetësuar dhe shpërdoruar fondet e pensioneve dhe të ndihmës ekonomike, duke falsifikuar nënshkrimet e pensionistëve që jetonin jashtë shtetit. Ndërkohë, shtetasja E. Ç. dyshohet se ka manipuluar, hequr dhe falsifikuar mandatpagesat nga evidenca e librave të arkës dhe sistemit të menaxhimit të parave cash, duke favorizuar kështu vjedhjen e fondeve nga ana e 29-vjeçares, siç bëri me dije policia.