Të Shtunën i Jepet Lamtumira e Fundit / Misteri i Vrasjes së Hekuran Cumanit
Të shtunën do të zhvillohet ceremonia mortore për Hekuran Cumanin, 23-vjeçarin me origjinë shqiptare, i cili humbi jetën më 18 tetor në parkingun e Departamentit të Matematikës në Perugia.
Ai u vra me thikë, ku një goditje në zemër dhe mushkëri i mori çdo mundësi mbijetese. Sulmi ndodhi gjatë një konfrontimi mes dy grupesh të rinjsh, rrethanat e të cilit mbeten ende të paqarta. Hetimet për ngjarjen janë ende në vijim.
Një 21-vjeçar me origjinë tuniziane po hetohet për vrasjen. Ai akuzohet gjithashtu edhe për kërcënime të rënda dhe akuza të tjera. Bashkë me të, po hetohen edhe një 18-vjeçar me origjinë marokene dhe një 22-vjeçare italiane.
Sipas rindërtimit të ngjarjes, italiania mbërriti në vendin ku ndodhi ngjarja më vonë. Megjithatë, në makinën e saj u gjet një thikë, të cilën dyshohet se e mori i dashuri i saj.
Dy grupet e të rinjve kishin nisur të ziheshin më herët në një lokal nate. Madje edhe roja i lokalit akuzohet për sulm për plagosjen e vëllait të Hekuranit. Vetë roja pretendon se plagosja ishte aksidentale gjatë përpjekjes për t’i ndarë grupet.