Ish-ministrja konservatore në Britani u gjet e pajetë në banesën e saj dhe me shenja në kokë; autoritetet nisin hetimet për vrasje.
Policia britanike ka nisur një hetim për vrasje pas gjetjes së ish-ministres konservatore Anne Widdecombe, e cila u konstatua pa jetë dhe me lëndime të rënda në kokë në banesën e saj në Devon.
Sipas autoriteteve, oficerët mbërritën në shtëpinë e 78-vjeçares në Haytor, Dartmoor, pasi shërbimi i ambulancës njoftoi policinë. Në momentin e mbërritjes, ish-ministrja u gjet me plagë të rënda dhe më vonë u konfirmua vdekja e saj.
Vdekja e saj u bë publike fillimisht të premten nga agjenti i saj, pa asnjë indikacion se mund të ishte pasojë e një akti kriminal. Megjithatë, vetëm disa orë më vonë, Policia e Devonit dhe Cornëallit njoftoi se rasti tashmë po trajtohet si vrasje.
Hetuesit kanë bërë të ditur se janë në kërkim të një burri të bardhë, i cili dyshohet se mund të jetë i përfshirë në ngjarje. Kreu i hetimit deklaroi se çështja ndodhet ende në fazat e hershme, por hetimet po zhvillohen me ritëm të shpejtë.
“Hetimi për vrasjen është në fazat fillestare, por po ecën me një ritëm të konsiderueshëm. Kemi angazhuar të gjitha burimet e nevojshme për të përcaktuar saktësisht se çfarë ka ndodhur dhe për të identifikuar personin përgjegjës,” tha ajo.
Policia u ka bërë thirrje qytetarëve që kanë informacion, edhe nëse e konsiderojnë të parëndësishëm, të kontaktojnë autoritetet. Hetuesit po kërkojnë veçanërisht dëshmitarë që mund të kenë vërejtur lëvizje të dyshimta në zonën e Haytor Vale, si edhe pamje nga kamerat e sigurisë, kamerat e ziles së derës apo kamerat e automjeteve.
Ndërkohë, ekspertët e kriminalistikës vijojnë ekzaminimin e banesës së Anne Widdecombe, e cila mbetet e rrethuar nga forcat e policisë.