“`html
Yield-i i obligacioneve 20-vjeçare rritet lehtë në 6.54%
Yield-i i obligacioneve 20-vjeçare është rritur lehtë në ankandin e kësaj jave, duke konfirmuar një tendencë të lehtë në rritje të kthimeve për instrumentet financiare afatgjata në tregun vendas.
Sipas informacionit të publikuar nga Banka e Shqipërisë, yield-i mesatar i ponderuar dhe kuponi i obligacioneve 20-vjeçare në ankandin e rihapjes së kësaj jave ka arritur në 6.54%. Ky nivel është më i lartë se 6.5% që ishte në ankandin e emetimit fillestar të këtyre instrumenteve në muajin maj.
Kërkesa në ankand ka treguar një përmirësim të ndjeshëm krahasuar me ankandet e fundit të instrumenteve të borxhit afatgjatë. Nga shuma e shpallur për financim prej 1.5 miliardë lekë, vlera totale e kërkesave në ankand arriti në më shumë se tre miliardë lekë. Ministria e Financave ka vendosur të rrisë vlerën e emetimit në 1.725 miliardë lekë.
Rritja e vlerës së emetimit ka sjellë një shtim të lehtë të yield-it në ankand, i cili sipas rregullores është uniform me yield-in e kërkesës më të lartë të pranuar. Megjithatë, pavarësisht kësaj rritjeje të vogël, ankandi i obligacioneve 20-vjeçare ka kontribuar në një zbutje të pjerrësisë së kurbës së yield-eve të titujve qeveritarë.
Ky zhvillim mund të shpjegohet kryesisht me rritjen e kërkesës së investitorëve në ankand. Nga ana tjetër, perspektivat për normat e interesit mbeten të pasigurta, por skenari më i mundshëm duket të jetë një rritje, qoftë edhe e moderuar, brenda këtij viti.
Tensionet gjeopolitike në Lindjen e Mesme po mbajnë të larta çmimet e naftës, duke u reflektuar në kosto të larta karburantesh. Çmimi i gazoilit në pikat e shitjes me pakicë ka arritur pranë kufirit të 220 lekëve. Qeveria nuk ka dhënë sinjale për lehtësi fiskale që mund të sjellin një zbutje të rëndësishme të çmimeve, ndërsa Bordi i kontrollit të tyre është shfuqizuar prej muajsh.
Në këto kushte, është e pritshme që inflacioni të vazhdojë të rritet gjatë muajve të ardhshëm. Në muajin korrik, inflacioni regjistroi nivelin 3.4%, duke shënuar nivelin më të lartë në rreth dy vite e gjysmë.
Banka e Shqipërisë ka preferuar të presë, duke shpresuar që vala inflacioniste të jetë kalimtare. Sidoqoftë, të paktën për sa i përket çmimeve të produkteve energjetike, nuk ka sinjale për një normalizim të shpejtë të situatës.
Norma bazë e interesit mbetet në nivelin 2.5%, të paktën deri në vendimmarrjen e ardhshme të politikës monetare, e cila është planifikuar për datën 7 tetor.
Tregu financiar vendas ka reaguar me një zhvendosje në rritje të yield-eve gjatë tremujorit të dytë dhe të tretë. Kjo rritje reflekton pritshmëritë për interesa më të larta, si dhe dinamikat e brendshme të raporteve midis kërkesës dhe ofertës, veçanërisht pas mesit të vitit./ E.Shehu
“`