Zelensky përgjigjet kërkesës së SHBA-ve: Jemi gati për të zhvilluar zgjedhje presidenciale në Ukrainë
Presidenti ukrainas Volodymyr Zelensky ka deklaruar se Ukraina është e gatshme të zhvillojë zgjedhje presidenciale, duke iu përgjigjur kështu një kërkese nga Shtetet e Bashkuara të Amerikës, sipas raportimit të Kyiv Post.
“Shtetet e Bashkuara të Amerikës na dërguan një kërkesë për të mbajtur zgjedhje presidenciale dhe unë u thashë atyre se do të isha gati për zgjedhje të tilla,” u shpreh Zelensky për gazetarët të enjten në mëngjes.
Ai shtoi se aktualisht nuk po shqyrtohen zgjedhje parlamentare apo lokale.
Duke komentuar mbi mundësitë e votimit për ukrainasit jashtë vendit, Zelensky theksoi se ai prej kohësh mbështet futjen e votimit në distancë ose elektronik.
“Gjithmonë e kam mbështetur dhe që nga fillimi i Covid-it kam ngritur çështjen e ndryshimeve legjislative në mënyrë që njerëzit të mund të votojnë online, por deri më tani nuk kemi arritur të gjejmë një konsensus me deputetët,” tha ai.
Sipas Zelenskyt, nuk ka pasur progres në parlament sa i përket ndryshimeve në legjislacionin zgjedhor të Ukrainës.
“Për sa di unë, ende nuk ka diçka të tillë, por u kam dhënë të gjitha sinjalet,” tha Zelensky, duke iu përgjigjur pyetjes nëse deputetët po punojnë për ndryshime në ligjin zgjedhor.