Zjarret masive në Pirenej, Franca, Spanja dhe Portugalia nën flakë
Më shumë se 10,000 persona janë detyruar të evakuohen nga banesat e tyre për shkak të zjarreve të mëdha që kanë përfshirë malet e Pirenejve, në jug të Francës, pranë kufirit me Spanjën.
Autoritetet franceze njoftojnë se flakët vijojnë të jenë jashtë kontrollit, ndërsa erërat e forta dhe temperaturat ekstreme po kontribuojnë në përhapjen e tyre.
Përballë kësaj situate të rëndë, Franca ka aktivizuar Mekanizmin Evropian të Mbrojtjes Civile. Bashkimi Evropian ka dërguar katër avionë zjarrfikës nga Suedia dhe Qiproja, si dhe mbi 100 zjarrfikës për të mbështetur operacionet.
Sipas autoriteteve lokale, deri më tani janë plagosur 16 persona, përfshirë katër zjarrfikës. Mbi 11,000 hektarë tokë janë përfshirë nga zjarret në rrëzë të Pirenejve.
Vala rekord e të nxehtit që ka goditur Francën pritet të intensifikohet edhe më tej ditët në vijim, duke rritur rrezikun e zjarreve.
Për shkak të situatës, një etapë e garës së famshme Tour de France u mbyll për publikun në mënyrë që forcat e emergjencës të kenë përparësi, ndërsa u kufizua edhe itinerari i çiklistëve.
Zjarret përfshijnë edhe Spanjën dhe Portugalinë
Në anën spanjolle të kufirit, zjarret kanë shkatërruar rreth 22,000 hektarë tokë, ku 97% e sipërfaqes së djegur ndodhet në zonën e mbrojtur natyrore Les Gavarres.
Ndërkohë, në provincën Castellón, rreth 500 banorë janë evakuuar pas shpërthimit të një zjarri në parkun natyror Sierra de Espadán.
Edhe Portugalia po përballet me qindra vatra zjarri. Zjarri më i madh ka djegur mbi 11,000 hektarë, ndërsa Spanja ka dërguar 118 zjarrfikës, 45 mjete dhe tre avionë në ndihmë të autoriteteve portugeze.
Sipas agjencisë Lusa, vetëm nga 1 deri më 5 korrik janë djegur mbi 150,000 hektarë tokë në Portugali. Krahasuar me vitin 2025, sipërfaqja e djegur është katërfishuar, ndërsa numri i zjarreve është rritur me rreth 70%.
Vala e të nxehtit po rrit numrin e viktimave
Ekspertët lidhin intensifikimin e zjarreve me ndryshimet klimatike, duke theksuar se Europa është kontinenti që po ngrohet më shpejt në botë.
Temperaturat rekord kanë sjellë pasoja të rënda edhe për shëndetin e popullsisë. Sipas të dhënave të publikuara, vala e të nxehtit ka shkaktuar të paktën 2,025 vdekje shtesë në Francë, 1,222 në Belgjikë dhe rreth 480 në Holandë, ndërsa autoritetet paralajmërojnë se rreziku mbetet i lartë edhe gjatë ditëve në vijim.