Zvërneci, Ibrahimaj: Nuk ka projekt të miratuar, ai 4 mld euro u rrëzua nga KKTU
Gjatë një deklarate për shtyp pas përfundimit të mbledhjes së qeverisë, ministrja e Ekonomisë dhe Inovacionit, Delina Ibrahimaj, konfirmoi se nuk ekziston ende një projekt konkret i miratuar për zhvillimin e zonës së Zvërnecit.
Në përgjigje të pyetjeve të gazetarëve lidhur me shqetësimet dhe protestat e zhvilluara me kërkesën për anulimin e projektit, ministrja Ibrahimaj theksoi se çdo propozim që do të paraqitet do të shqyrtohet për plotësimin e standardeve të Bashkimit Europian sa i përket efekteve mjedisore.
Ajo sqaroi:
- “Prej fillimit të protestave kemi qenë të qartë dhe transparentë se nuk kemi ende një projekt për zhvillimin e zonës së Zvërnecit.”
- “Aktualisht, arkitektë të njohur, studiues dhe inxhinierë po punojnë për studimin e ndikimit në mjedis.”
- “Siç e kemi sqaruar publikun disa herë, jemi në fazën e studimit dhe projektimit.”
- “Qeveria shqiptare nuk disponon një projekt final për ta ndarë me publikun.”
- “Në momentin që do të paraqitet një propozim, shqetësimi ynë kryesor do të jetë plotësimi dhe respektimi i standardeve të ndikimit në mjedis.”
- “Synimi ynë është që projekti të miratohet dhe të vazhdojë sipas standardeve të BE-së.”
- “Kemi një proces të nisur me BE-në, me një kalendar detyrash të mirëpërcaktuar, duke përfshirë legjislacionin për mbrojtjen e mjedisit.”
- “Në momentin që do të na vijë një projekt, ai do të analizohet dhe do të bëhet transparent.”
- “Dëshirojmë që një projekt me një përmasë të tillë financiare të vijë në Shqipëri, jo vetëm për ndikimin në ekonomi, por edhe për imazhin turistik.”
- “Ne jemi mbështetës të vijimit të këtij projekti.”
Lidhur me vlerësimin e efekteve ekonomike nga qeveria për një projekt me raportim rreth 4 miliardë euro, Delina Ibrahimaj sqaroi se projekti në fjalë është rrëzuar nga Këshilli Kombëtar i Territorit dhe Ujit (KKTU) për mospërmbushje të standardeve.
“4 miliardë euro ka qenë një projekt i dorëzuar më parë, i cili nuk u miratua nga Këshilli Kombëtar i Territorit dhe Ujit, sepse nuk plotësonte standardet sa i përket intensitetit të ndërtimit dhe ndikimit në mjedis. Vendimet e KKT-së janë bërë transparente bashkë me arsyet e rrëzimit. Nuk e dimë se sa do të jetë vlera e projektit që do të vijë për miratim,” theksoi ajo.
Gjithashtu, pak ditë më parë, Parlamenti Europian, përmes një amendamenti të miratuar, ka kërkuar ndalimin e projekteve të reja në të gjitha zonat e mbrojtura, përfshirë edhe ato të Vjosë-Nartë.