Raporti i inteligjencës amerikane: Putin do të vazhdojë luftën me çdo çmim
Sipas raportimeve të NBC News, duke cituar burime të inteligjencës amerikane, Vladimir Putin pritet të vazhdojë luftën në Ukrainë me çdo çmim deri sa të arrijë qëllimet e tij.
Raporti thekson se, pavarësisht humbjeve të mëdha të Ushtrisë ruse dhe një krize ekonomike në rritje në vend, Putin ka adoptuar një qasje edhe më agresive. Objektivat e tij përfshijnë justifikimin e humbjeve të mëparshme, marrjen e territoreve shtesë në Ukrainë dhe konsolidimin e kontrollit mbi zona strategjike.
Nga ana tjetër, sipas The Economist, me ritmin aktual të ofensivës ruse, kapja e plotë e Donbasit dhe rajoneve të tjera pjesërisht të pushtuara mund të zgjasë deri në vitin 2030. Që nga maji, kur Rusia nisi një ofensivë të re në shkallë të gjerë, ajo ka marrë vetëm 0.4% të territorit ukrainas, pa arritur ndonjë fitore të rëndësishme.