Takimi Merz-Erdogan: DW thekson kultivimin e marrëdhënieve gjermano-turke. Kancelari gjerman shprehet kritik për disa çështje.
Kancelari gjerman, Friedrich Merz, u takua me Presidentin turk, Recep Tayyip Erdoğan, në një vizitë e cila u karakterizua nga përpjekjet për të kultivuar marrëdhëniet gjermano-turke. Shkëmbimet duket se kanë qenë më harmonike, përveç çështjes së Lindjes së Mesme.
Gjatë konferencës së përbashkët për shtyp, Kancelari Merz iu referua krizave gjeopolitike globale, duke theksuar nevojën për partneritete strategjike më të ngushta për Gjermaninë. Ai nënvizoi se Turqia nuk mund të anashkalohet në këtë proces. Merz theksoi se të dy vendet janë të lidhura ngushtë si nga pikëpamja sociale edhe ekonomike, duke përbërë kështu themelin e marrëdhënieve dypalëshe. Për më tepër, si Gjermania edhe Turqia janë anëtare të NATO-s, duke ndarë kështu lidhje të rëndësishme edhe në fushën e politikës së sigurisë.
Roli kyç i Turqisë në konfliktet ndërkombëtare
Presidenti Erdoğan luan një rol qendror në konfliktet aktuale. Ai është i angazhuar ndjeshëm si në procesin e paqes në Lindjen e Mesme, ashtu edhe në marrëveshjen për armëpushimin në Gaza. Kancelari Merz e falënderoi atë për përpjekjet e tij gjatë konferencës për shtyp. Merz diskutoi me Presidentin Erdoğan mënyrat për të siguruar më tej procesin e paqes, edhe pse ekzistojnë pikëpamje të kundërta lidhur me organizatën Hamas, si dhe qëndrime të ndryshme ndaj Izraelit.
I pyetur nga një gazetar turk për qëndrimin ndaj Izraelit, Merz deklaroi se Gjermania do të qëndrojë gjithmonë “me vendosmëri në anën e shtetit të Izraelit”. Megjithatë, ai shtoi se kjo nuk do të thotë që Gjermania do të pranojë çdo vendim të marrë nga qeveria izraelite.
Nga ana tjetër, Presidenti turk iu referua numrit të viktimave në Rripin e Gazës, duke akuzuar Izraelin për “gjenocid” dhe për lënien e popullsisë palestineze në kushte urie.
Ukraina, migrimi dhe të drejtat e njeriut në Turqi
Lufta në Ukrainë ishte gjithashtu temë diskutimi. Turqia shprehu dëshirën për të ndërmjetësuar dhe ka organizuar takime mes palëve ndërluftuese, megjithëse me sukses të kufizuar deri më tani. Erdoğan ka mbajtur të hapura të gjitha opsionet, duke furnizuar Ukrainën me armë, por pa marrë pjesë në paketat e sanksioneve evropiane kundër Rusisë. Kancelari Merz shprehu shpresën për përparime në këtë çështje.
Gjermania kërkon gjithashtu një marrëveshje me Presidentin Erdoğan në çështjen e migracionit. Merz dëshiron që Turqia të mbështesë Gjermaninë në dëbimin e shtetasve të huaj, duke përfshirë si qytetarët turq, ashtu edhe dëbimet drejt Sirisë. Kancelari gjerman beson se bisedimet për këtë temë janë në rrugën e duhur.
Sa i përket të drejtave të njeriut në Turqi, Merz u përgjigj shkurt gjatë konferencës për shtyp. Ai theksoi se ka situata në Turqi që nuk përputhen me kuptimin gjerman të sundimit të ligjit. Kancelari Merz shtoi se gjatë diskutimeve me Presidentin Erdoğan, ai i kishte shprehur shqetësimin në lidhje me pavarësinë e gjyqësorit, por nuk dha detaje shtesë.