Goditet rrjeti i mafias shqiptare në Spanjë/ Mbi 2 ton drogë dhe 25 mln euro të sekuestruara
Autoritetet spanjolle kanë shkatërruar një rrjet të mafias shqiptare, i cili merrej me shpërndarjen e sasive të mëdha droge drejt territorit spanjoll dhe vendeve të tjera të Europës.
Operacioni, i cili ka zgjatur për dy vite, ka rezultuar në sekuestrimin e mbi 687 kilogramëve kokainë dhe 2.500 kilogramëve hashash. Gjithashtu, janë bllokuar më shumë se 1,5 milionë euro cash dhe janë arrestuar disa nga personat kyç të organizatës, përfshirë trafikantë dhe një polic i përfshirë në skemë.
Hetimet kanë zbuluar një mënyrë të sofistikuar veprimi, ku Ibiza shërbente si pikë kyçe për hyrjen e drogës në Europë, ndërsa rrjetet e shpërndarjes ishin të vendosura në Mallorca dhe pjesë të tjera të Spanjës.
Sipas informacioneve nga mediat spanjolle, operacioni ka çuar në sekuestrimin e 687 kg kokainë, 2.500 kg hashash dhe mbi 1,5 milionë euro, sipas të dhënave të Policisë Kombëtare dhe Gardës Civile. Megjithatë, rrjeti drejtuar nga një person i identifikuar si Milojevic menaxhonte shumë më tepër. Vetëm në Mallorca, dokumentet e sekuestruara tregojnë se janë shitur 2.107 kg kokainë dhe 5.647 kg hashash, duke gjeneruar fitime mbi 25 milionë euro.
Mafia shqiptare, pjesë e së cilës dyshohet të jetë Milojevic, përdorte Ibiza-n si portë hyrëse për Europën për sasi të mëdha droge, sipas hetuesve. Këto përfundime janë mbështetur në bisedat e përgjuara telefonike dhe në banesat e trafikantëve.
Lëndët narkotike mbërrinin me anije tregtare nga Afrika dhe Amerika e Jugut. Nga këto anije, paketat e drogës hidheshin në det të hapur, prej nga ku merreshin nga rrjeti me anije të fuqishme dhe transportoheshin në breg.
Në Ibiza, ku banonin disa anëtarë të kësaj mafie, ekzistonte një infrastrukturë e zhvilluar për ruajtjen e drogës para shpërndarjes.
Hetuesit kanë zbuluar gjithashtu se trafikantët kishin instaluar të paktën dy pajisje gjurmimi në automjete policie për të monitoruar lëvizjet e tyre, duke shmangur kështu operacionet dhe duke siguruar zbarkimin e suksesshëm të sasisë së hashashit.
Një pjesë e madhe e drogës transportohej më pas drejt Mallorcas, ku Milojevic kishte një rrjet të gjerë bashkëpunëtorësh për fshehjen dhe shitjen e saj, kryesisht tek klanet e njohura si Son Banya, La Soledat dhe Corea, por edhe tek blerës të tjerë në zonën Part Forana.
Hetuesit theksojnë se organizata kishte një pronë në Llucmajor, ku droga ruhej në konteinerë të varur, duke u fokusuar më shumë në frikën e grabitjes nga trafikantë të tjerë sesa nga masat e sigurisë ndaj autoriteteve.
Ndër personat kyç të identifikuar është edhe avokati Gonzalo Márquez, i cili konsiderohet “truri, ideatori dhe figura kryesore që drejton aktivitetin kriminal dhe pastron fitimet ekonomike”, sipas raporteve të Policisë dhe Gardës Civile.
Dokumentet e hetimit tregojnë se rrjeti kishte krijuar disa shoqëri tregtare për të blerë tre hotele në Mallorca, Pamplona dhe Almansa (Albacete).
Në një nivel tjetër të organizatës ndodhet inspektori i Policisë Kombëtare Faustino Nogales, i akuzuar për dhënien e informacioneve të klasifikuara trafikantëve dhe për sinjalin që çoi në arrestimin e Milojevic, Márquez dhe vetë Nogales në muajin gusht. Të tre ndodhen aktualisht në burg.
Pjesa më e madhe e drogës transportohej e fshehur në kamionë nga Ibiza drejt Valencias, ku mafia shqiptare gjithashtu kishte infrastrukturë. Më pas, organizata kujdesej për shpërndarjen e saj në pika të tjera të Spanjës dhe në pjesën tjetër të Europës, sipas të dhënave nga hetimet.