Poloni: Prokurorët kërkojnë paraburgim për ish-ministrin e Drejtësisë
Zyra e Prokurorit të Përgjithshëm polak ka kërkuar që ish-ministri i Drejtësisë, Zbigniew Ziobro, të vihet nën hetime lidhur me akuza për korrupsion.
Parlamenti polak i ka hapur rrugën hetimeve një javë më parë, duke i hequr Ziobro imunitetin si ligjvënës i opozitës. Nga viti 2015 deri në vitin 2023, Ziobro mbajti postin e ministrit të Drejtësisë në qeverinë nacionaliste konservatore, e udhëhequr nga partia e krahut të djathtë Ligj dhe Drejtësi (PiS).
Prokuroria publike dhe qeveria e re liberale, drejtuar nga ish-presidenti i Këshillit të BE-së, Donald Tusk, e akuzojnë atë për korrupsion dhe shpërdorim detyre. Konkretisht, ai përballet me 26 vepra penale, përfshirë dyshimin për themelimin dhe anëtarësimin në një organizatë kriminale, si dhe dyshimin për përvetësimin e shumës prej rreth 35 milionë eurove (40 milionë dollarë).
Hetuesit deklarojnë se 55-vjeçari, në rast dënimi, mund të përballet me deri në 25 vjet burg.
Ish-ministri ka mohuar kategorikisht akuzat, duke i cilësuar ato si “të rreme dhe të sajuara”, dhe ka folur për një “fazë tjetër hakmarrjeje” nga ana e kryeministrit.
Megjithatë, për momentin, Ziobro nuk do të burgoset menjëherë. Ai ndodhet aktualisht në Hungari, ku është takuar edhe me kryeministrin Viktor Orban. Dhjetorin e kaluar, ish-zëvendësi i Ziobro, Marcin Romanowski, i cili gjithashtu kërkohet nga prokuroria, u largua në Hungari dhe iu dha azil politik. Pritet që Ziobro të ndjekë një rrugë të ngjashme për të shmangur ndjekjen penale.