Shpërthen vullkani Sakurajima në Japoni, anulohen mbi 30 fluturime
Vullkani Sakurajima, i vendosur në ishullin kryesor Kyushu, në perëndim të Japonisë, ka shpërthyer sot. Kjo ngjarje ka çuar në anulimin e dhjetëra fluturimeve dhe ka ngritur një re tymi e hiri deri në 4.4 kilometra në atmosferë.
Mediat e huaja raportojnë se Sakurajima, i cili ndodhet në pjesën jugore të Kyushu, pranë qytetit Kagoshima, shpërtheu rreth orës 18:00 të së shtunës. Dy shpërthime të tjera u regjistruan rreth orës 2:30 të mëngjesit dhe 10:50 të mëngjesit.
Autoritetet njoftuan se ky është shpërthimi i parë që ka ngritur re tymi e hiri në lartësinë prej 4 kilometra ose më shumë në gati 13 muaj. Mediat lokale raportuan gjithashtu se 30 fluturime për në dhe nga aeroporti i Kagoshimës u anuluan për shkak të rënies së hirit vullkanik.
Sipas raportimeve, hiri vullkanik është zhvendosur në verilindje pas shpërthimit të fundit dhe pritej të binte mbi Kagoshima dhe prefekturën fqinje Miyazaki gjatë ditës së sotme.
Sakurajima është një nga vullkanet më aktive të Japonisë, me shpërthime të intensitetit të ndryshëm që ndodhin rregullisht. Në vitin 2019, hiri u hodh deri në 5.5 kilometra lartësi.