Trump bën thirrje për shpalljen e Vëllazërisë Myslimane si organizatë terroriste
Donald Trump ka nënshkruar një urdhër ekzekutiv që fillon procesin për të caktuar Vëllazërinë Myslimane, dhe disa prej degëve të saj, si Organizatë Terroriste e Huaj (FTO) dhe Terroriste Globale e Caktuar Posaçërisht (SDGT).
Urdhri i drejtuar Sekretarëve të Shtetit dhe Thesarit, kërkon paraqitjen e një raporti mbi atë nëse degë të caktuara të Vëllazërisë Myslimane, si ato në Liban, Egjipt dhe Jordani, duhet të caktohen si FTO dhe SDGT.
Brenda 45 ditëve nga publikimi i raportit, të dy sekretarët, në konsultim me Departamentin e Drejtësisë dhe Drejtorin e Inteligjencës Kombëtare, duhet të ndërmarrin veprime për të caktuar bashkëpunëtorët si terroristë (FTO dhe SDGT), nëse kjo konsiderohet e përshtatshme.
Qëllimi përfundimtar i urdhrit, siç theksohet nga Shtëpia e Bardhë, është të eliminojë aftësitë dhe aktivitetet e bashkëpunëtorëve të caktuar, t’i privojë ata nga burimet dhe të ndërpresë çdo kërcënim që këta bashkëpunëtorë mund të paraqesin për qytetarët amerikanë dhe sigurinë kombëtare të Shteteve të Bashkuara.
Përveç kësaj, Shtëpia e Bardhë deklaron se “Presidenti Trump po i drejtohet rrjetit ndërkombëtar të Vëllazërisë Myslimane, i cili nxit terrorizmin dhe fushatat destabilizuese kundër interesave dhe aleatëve të SHBA-së në Lindjen e Mesme”.
Si arsye specifike për këtë veprim, artikulli përmend:
- Pas sulmit të 7 tetorit 2023, krahu ushtarak i degës libaneze të Vëllazërisë Myslimane ndihmoi grupe terroriste të nisnin sulme të shumta me raketa kundër objektivave civile dhe ushtarake në Izrael.
- Një udhëheqës i lartë i Vëllazërisë Myslimane të Egjiptit inkurajoi sulme të dhunshme kundër partnerëve dhe interesave të SHBA-së në Lindjen e Mesme në të njëjtën ditë që Hamasi kreu sulmin e 7 tetorit.
- Raportet tregojnë se udhëheqësit e Vëllazërisë Myslimane jordaneze kanë ofruar prej kohësh mbështetje materiale për krahun e armatosur të Hamasit.
Për t’u bërë pjesë e grupit “Balkanweb”, mjafton të klikoni dhe kërkesa do t’ju aprovohet menjëherë.