Titulli: Misteri i avionit Wizz Air/ U përpoq 2 orë të ulej në Shkup, përfundoi në Prishtinë
Një avion i kompanisë Wizz Air, i nisur nga Venecia me destinacion Shkupin, përfundoi në Prishtinë. Sipas informacioneve, një aeroplan Airbus A321neo i kompanisë hungareze me kosto të ulët u përpoq të zbarkonte në aeroportin e Maqedonisë së Veriut për rreth dy orë, por pa sukses.
Pasi i kishte qëndruar rrotull aeroportit të Shkupit plot 17 herë, ai u orientua drejt Prishtinës, në Kosovë, ku u ul pa ndonjë problem të mëtejshëm.
Linja ajrore ia atribuoi problemin motit të keq, edhe pse avionë të tjerë u ngritën dhe u ulën në të njëjtën periudhë kohore, me dukshmëri të konsideruar si maksimale.
Aeroplani me 239 vende kaloi disa herë mbi aeroportin maqedonas në një lartësi shumë të ulët.
Avioni u nis nga Venecia në orën 14:33 dhe iu afrua Shkupit në orën 15:41. Nga ai moment, ai bëri disa manovra rrethuese, pa mundur të zbarkonte. Në orën 17:33, ai filloi fluturimin në drejtim të veriut, me destinacion Prishtinën. Ai u ul atje në orën 17:55, duke kaluar më shumë se tre orë nga momenti i nisjes.
“Wizz Air konfirmon se fluturimi W6 4752 nga Venecia në Shkup, më datë 25 nëntor, është devijuar në Prishtinë për shkak të kushteve të këqija të motit në Shkup”, – i tha linja ajrore portalit Corriere. “Të gjithë pasagjerët do të transportohen në Shkup me mjete tokësore. Siguria e pasagjerëve, ekuipazhit dhe avionëve tanë është përparësia jonë kryesore dhe ne falënderojmë ekuipazhin tonë për profesionalizmin e tyre dhe pasagjerët për mirëkuptimin e tyre.”
Megjithatë, linja ajrore nuk dha shpjegime se pse avionë të tjerë arritën të uleshin pa incidente.