Dokumenti: Meta thotë se ka dëshmi të reja për 21 Janarin
Presidenti i Partisë së Lirisë, Ilir Meta, i cili ndodhet në burg, ka bërë një kërkesë për t’u marrë në pyetje në lidhje me dosjen e 21 janarit.
Në shkresën drejtuar Prokurorit të Posaçëm, Alfred Shehu, Ilir Meta shprehet se ka dijeni dhe mund të japë dëshmi të vlefshme për rrethanat e ngjarjes.
“Unë kam dijeni dhe mund të jap dëshmi të vlefshme për rrethanat e asaj ngjarje, dëshmi të cilat nuk janë të njohura nga organi procedues, të cilat mund t’i shërbejnë për të zbardhur ngjarjen”, shkruan Meta në shkresë.
Ilir Meta shprehet se është në dispozicion të organit të procedurës në çdo moment që ajo do të jetë e gatshme.
Kujtojmë se më 21 Janar të vitit 2011, Ilir Meta ka qenë zëvendëskryeministër në qeverinë e Sali Berishës. Hetimet për 21 janarin 2011 nisën pas kërkesës së familjarëve të Aleks Nikës në Gjykatën e Lartë, për të vetmen vrasje pa autor të 21 janarit, për shkak se predha që iu hoq nga trupi në Turqi ishte e dëmtuar.
Familja e Nikës prej më shumë se një dekade kërkon drejtësi për vrasjen e djalit të tyre dhe tashmë SPAK pritet të zbardhë të vërtetën e asaj ngjarje dhe rolin e kupolës më të lartë shtetërore. Ndërkohë, në korrik të vitit 2024, Prokuroria e Tiranës i dërgoi dosjen e ‘21 Janarit’ Prokurorisë së Posaçme.
SPAK pak ditë më parë mori në pyetje kreun e PD, Sali Berisha, në cilësinë e kryeministrit të asaj kohe. Po ashtu, në pyetje është marrë edhe Lulzim Basha, në cilësinë e ministrit të Brendshëm.
Shkresa:
- KERKUES: Ilir METAJ, i biri Rexhepit, dhe Fiqiretes, datëlindja 24 mars 1969, lindur në Çepan, Skrapar, me adresë pranë Institucionit Ekzekutimit Vendimeve Penale “Jordan Misja” Tiranë.
- Përfaqësuar me Akt-Përfaqësimi, të lëshuar më datë 22.05.2025 nga Studio Ligjore CAKRANI, me NUIS M03525401G, av. Kujtim Cakrani me nr license 8315 regjistruar pranë Dhomës Avokatisë Fier. Email: nr.0699413001.
- OBJEKTI: Kërkesë për të dëshmuar si person në dijeni të veprës penale, lidhur me çështjen penale nën hetim të ngjarjes 21 janarit 2011.
- BAZA LIGJORE: Neni 312 1 Kodit të Procedurës Penale.
- DREJTUAR: Prokurorit z. Alfred SHEHU, Prokuror Pranë Prokurorisë Kundër Korrupsionit dhe Krimit Organizuar (SPAK).
I nderuar z. Prokuror!
Prokuroria Kundër Korrupsionit dhe Krimit Organizuar, ka regjistruar procedimin penal dhe po kryen hetime lidhur me ngjarjen e 21 janarit 2011. Unë, Ilir Rexhep Metaj, duke qënë se, kam dijeni dhe mund të jap dëshmi të vlefshme për rrethanat e asaj ngjarje, dëshmi të cilat nuk janë të njohura nga organi procedues, të cilat mund t’i shërbejnë për të zbardhur ngjarjen. Jam në dispozicion të organit procedurës në çdo moment që ajo do të jetë e gatshme!
Kërkuesi, Ilir Meta