Khamenei: SHBA-të dështuan në luftën 12-ditore
Udhëheqësi suprem i Iranit, Ali Khamenei, deklaroi në një fjalim televiziv se pavarësisht përdorimit të armëve më të fundit dhe më moderne, Shtetet e Bashkuara të Amerikës nuk arritën të kishin sukses në luftën 12-ditore kundër Iranit.
Sipas tij, Irani ka krijuar një front të fortë rezistence kundër ndërhyrjeve të huaja dhe ruajtja e tij është thelbësore. “Një vend si i yni ka nevojë për mobilizim më shumë se kushdo tjetër. Ka shumë armiqësi, lakmi dhe ndërhyrje nga autoritetet në botë dhe duhet të ketë një element rezistence kundër të gjitha këtyre shtypjeve dhe veprimeve ekstreme,” theksoi ai.
Duke folur për zhvillimet e fundit brenda Iranit dhe në rajon, Khamenei shtoi: “Në luftën 12-ditore, populli iranian padyshim mundi si Amerikën ashtu edhe Izraelin. Ata u kthyen pa arritur asgjë, që do të thotë se nuk arritën asnjë nga qëllimet e tyre. Po, pësuam humbje, humbëm jetë të çmuara, nuk ka dyshim për këtë, e tillë është natyra e luftës. Por dëmi material që iu shkaktua armikut ishte shumë më i madh se dëmi që iu shkaktua vendit tonë.”