Emrat/ S’kanë fund ushtarët e krimit në polici, por Proda nuk lëviz nga karrigia
Efektivi i Antiterrorit Igli Haxhia u arrestua brenda Akademisë së Sigurisë, në një operacion të sinkronizuar me SPAK dhe sipas informacioneve të mbërritura nga Italia. Ai është oficeri i radhës i policisë që u prangos pasi rezultoi të ishte rekrutuar nga një grup i trafikut ndërkombëtar të drogës.
Nga përgjimet e italianëve, rezulton se në kohën kur shërbente në Forcën e Posaçme Operacionale, Haxhia ka tradhtuar detyrën duke kaluar në anën e krimit. Nga efektiv i Operacionale, ai u kthye në burim informacioni për bandën, e cila sot është goditur në bashkëpunim me Antimafian e Breshias dhe autoritetet zvicerane.
Hetimet e përbashkëta tregojnë se oficeri i Operacionales ka nxjerrë në treg sekretin hetimor për personat e dyshuar. Sipas SPAK, Igli Haxhia merrte para në këmbim të të dhënave, duke mbyllur njërin sy për disa nga detyrat e tij në shërbim të trafikantëve të drogës.
Rasti i Haxhias lidhet drejtpërdrejt me një operacion të madh antidrogë, ku një grup i strukturuar kriminal me bazë në territorin shqiptar dyshohet se ka importuar mbi 1300 kilogramë kokainë nga Amerika e Jugut drejt Europës Veriore, për ta futur më pas në Itali me mjete të tonazhit të rëndë. Në këtë mekanizëm, roli i një oficeri policie që ka akses në informacion, në veprime hetimore dhe në akte të klasifikuara është i paçmuar për kriminelët.
Por rekrutimi i një polici nga bandat, ka kohë që nuk është më lajm në Shqipëri.
Gangrena e policëve që tradhtuan uniformën
Vitet e fundit janë të shumta rastet kur efektivë policie, nga njësitë speciale te rendi i thjeshtë, janë kapur si pjesë e organizatave kriminale.
- Pak javë më parë, Muçi Sheqeri, oficer i Agjencisë së Mbikëqyrjes Policore, u përfshi në një atentat. Ai ishte në rolin e shoferit dhe shoqëruesit për një prej njerëzve të lidhur me një person me dënime për vepra të rënda kriminale.
- Rasti i Ervis Martinajt tregon të njëjtin model bashkëpunimi mes policisë dhe krimit. Jeton Lami, efektiv i Njësisë Operacionale në skuadrën FAST, e shoqëronte Martinajn në lëvizjet e tij, megjithëse ky i fundit ishte i shpallur në kërkim. Hetimet provuan se Lami ishte personi që e kishte shoqëruar deri në Durrës pak orë para se Martinaj të zhdukej.
- Në Shkodër, oficerët e hetimit nuk kanë qenë gjithmonë vetëm në anën e ligjit. Ardit Hasanbegaj, oficer në strukturat e hetimit dhe rendit publik, u ekspozua nga bisedat e dekriptuara si pjesë e një grupi kriminal. Ai u akuzua nga SPAK për sigurim të kushteve dhe mjeteve materiale për të kryer vrasje. Pra sërish një efektiv policie në shërbim të planeve kriminale të një grupi, jo për t’i zbuluar krimet e tyre, por për t’i realizuar ato.
- Edhe kupola e policisë nuk ka qëndruar e paprekur nga akuzat. Oltion Bistri, ish shef i Forcës së Posaçme Operacionale dhe më pas ish drejtor i Policisë në Durrës dhe Lezhë, u arrestua si pjesë e një rrjeti kriminal. Një drejtues i lartë i policisë, që në teori duhet të udhëheqë luftën kundër krimit të organizuar, rezultoi të ishte pjesë e tij.
- Në Lezhë, ish drejtori Henrigert Mitri rezultoi i rekrutuar nga një grup kriminal i kultivimit dhe trafikimit të kanabisit dhe në aktivitetet e lojërave të fatit. Aktiviteti i tij u dokumentua po ashtu nga bisedat e koduara, një tjetër rast ku teknologjia nxjerr në pah lidhjen mes uniformës dhe bandës.
- Lista vijon me emra të tjerë. Dritan Metaj u arrestua nga SPAK si pjesë e një grupi të madh trafiku droge në vend. Arlind Ismailukaj, efektiv policie, u prangos në një operacion të lidhur sërish me trafikun e lëndëve narkotike.
Të gjitha këto raste, të marra së bashku, e shndërrojnë atë që shpesh prezantohet si devijim individual në një model të përsëritur, ku krimi i organizuar nuk e ka aspak të vështirë të blejë besnikërinë e njerëzve brenda uniformës. Seria e emrave tregon se organizatat kriminale nuk kënaqen më me korruptimin eposodik të zyrtarëve të zakonshëm, por se e kanë vënë nën shërbimin e tyre të vazhdueshëm trupën policore duke kapur kupolën e saj.
Në krye të policisë, i paprekshmi Ilir Proda
Pavarësisht rasteve të shumta që janë zbuluar kur policët kanë qenë në shërbim të bandave, kryeministri Edi Rama ka refuzuar të pranojë nevojën e një reforme për pastrimin e policisë së shtetit. I pyetur për një atentat të fundit, kryeministri Rama devijoi duke folur për nevojën e kamerave të sigurisë, ndërkohë që atentati ishte filmuar plotësisht nga kamerat.
Këtij qëndrimi indiferent të Ramës për përfshirjen e policëve në rrjetet kriminale, i shtohet fakti se drejtori i Përgjithshëm, Ilir Proda, vazhdon ta ruajë të padiskutueshëm besimin e shefit të qeverisë. Duket se dyshja Rama-Proda janë në një simbiozë të rehatshme, ku njëri ruan shpatullat e tjetrit, pa u shqetësuar aspak nga fakti se nën komandën e Prodës, efektivët po kapen njëri pas tjetrit teksa shërbejnë si shoferë, roje sigurie, informatorë dhe korrierë për bandat që kontrollojnë trafikun e drogës dhe botën e krimit.
Çdo ditë që kalon, hetimet e SPAK, përgjimet e platformave të koduara dhe dosjet që vijnë nga Bashkimi Europian tregojnë se gangrena në polici ka avancuar në çdo kat të kësaj strukture.
Dyshimet se kjo gangrenë ka infektuar edhe kupolën e policisë i përforcoi rasti i Ritvan Palit
Ritvan Pali, ish shef komisariati nr.2 në Tiranë, vuri në pranga Altin Morinën, ish efektiv i RENEA-s i dyshuar për pjesëmarrje në organizatë kriminale dhe trafik droge. Nga përgjimet e koduara u zbulua se Morina ishte në shërbim të një bande disa vite më parë. Ai u arrestua në Tiranë në prill të këtij viti për të dytën herë.
Operacioni u ndoq nga afër nga SPAK dhe u konsiderua një goditje serioze ndaj një grupi kriminal me degëzime në disa qarqe. Por pas operacionit, në vend se të vlerësohej shefi i komisariatit, u bë “i padëshiruar” në sytë e drejtuesve më të lartë të policisë. Me urdhër të drejtorit të përgjithshëm Ilir Proda, Ritvan Pali nisi një kalvar transferimesh penalizuese. Fillimisht iu ul grada, më pas u zhvendos dhe përfundoi i “internuar” si specialist rendi në Kukës, një post ku nuk kishte asnjë lidhje me eksperiencën e tij profesionale dhe ku “ndëshkimi” ishte i dukshëm. Pali zgjodhi të largohej nga policia.
Në media u raportua se edhe disa prej efektivëve të përfshirë në operacion u transferuan në pozicione të tjera më të ulta, në dukje si ndëshkim për arrestimin e Altin Morinës.
Kur u pyet për këtë histori në komisionet parlamentare, Ilir Proda u përgjigj me ironi, por edhe duke pranuar se ishte ai që e kishte urdhëruar transferimin e policit: “Në qoftë se të shërbesh në Kukës qenka persekutim, ky është problemi juaj zoti Noka, jo i imi. Pyeteni se përse ka dhënë dorëheqjen, meqë mbakeni kontakt”.
Janë të shumta akuzat që e shënjestrojnë Ilir Prodën, si njeriun që qëndron detyrë, si garant i ekuilibrit mes bandave në njërën anë, dhe interesave të pushtetit në anën tjetër. E sigurtë është që për të, s’ka asnjë rëndësi që kaq shumë policë zgjedhin të paguhen nga krimi. Në fund të fundit, ata kanë kuptuar se janë të tradhëtuar në radhë të parë nga kupola e policisë, ndaj dhe asgjë nuk i pengon të kalojnë edhe vetë në anën tjetër të ligjit.