Zelensky forcon përpjekjet diplomatike mes sulmeve ruse dhe skandalit të korrupsionit
Presidenti ukrainas, Volodymyr Zelensky, po intensifikon përpjekjet diplomatike globale për arritjen e një marrëveshjeje paqeje, duke dërguar një ekip negociator në Shtetet e Bashkuara dhe duke planifikuar një vizitë në Paris. Kjo zhvillohet në kohën kur qeveria e tij përballet me një skandal korruptiv dhe Rusia po intensifikon sulmet ajrore.
Zelensky deklaroi se një ekip negociues është nisur drejt SHBA-së si pjesë e përpjekjeve për një “paqe të denjë” dhe për t’i dhënë fund luftës së nisur nga Rusia në shkurt 2022. Ai shtoi se më 29 nëntor, delegacioni do të drejtohet nga Rustem Umerov, ish-ministër i Mbrojtjes, i cili aktualisht mban postin e sekretarit të Këshillit të Sigurisë Kombëtare dhe Mbrojtjes së Ukrainës dhe është anëtar i ekipit negociator të Kievit.
Një zyrtar i lartë amerikan raportoi se sekretari i Shtetit, Marco Rubio, i dërguari i posaçëm Steve Witkoff dhe dhëndri i presidentit Donald Trump, Jared Kushner, do të udhëtojnë në Florida për t’u takuar me delegacionin ukrainas më 30 nëntor. Pas takimit në Florida, Witkoff pritet gjithashtu të vizitojë Moskën javën e ardhshme, në kuadër të përpjekjeve për finalizimin e një propozimi amerikan.
Në ndërkohë, autoritetet franceze njoftuan se presidenti Emmanuel Macron do të presë Zelenskyn në Paris më 1 dhjetor për të diskutuar “kushtet për një paqe të drejtë dhe të qëndrueshme”. Kievi dhe aleatët e tij evropianë, duke përfshirë Francën, Britaninë dhe Gjermaninë, po synojnë të hartojnë një plan paqeje alternativ ose të modifikuar, pasi Trump paraqiti një propozim me 28 pika, i cili sipas kritikëve, anonte në favor të Rusisë.
Zelensky nuk bëri komente lidhur me vizitën e planifikuar në Paris, ndërsa Macron ka qenë një nga mbështetësit kryesorë të Kievit në luftën kundër agresionit rus. Zelensky ishte gjithashtu në Paris më 17 nëntor. Versioni fillestar me 28 pika pasqyronte pozicionet e mbajtura nga Rusia të paktën që nga fillimi i pushtimit të Ukrainës. Kjo ngjarje shqetësoi zyrtarët ukrainas dhe raportohet se e zemëroi Zelenskyn, duke çuar në zhvillimin e bisedimeve dypalëshe me zyrtarët amerikanë. Plani “i rafinuar” me 19 pika, rezultat i këtyre bisedimeve, ende lë çështje kyçe të hapura, duke përfshirë fatin e rajonit Donjeck, të cilin Kremlini synon ta pushtojë. Pengesa të tjera përfshijnë këmbënguljen e Kremlinit për ndalimin e anëtarësimit të Ukrainës në NATO dhe një kufizim të mundshëm të madhësisë së ushtrisë së Kievit.
Shefi i stafit jep dorëheqje
Aktiviteti diplomatik vjen pas një jave të trazuar që kulmoi me dorëheqjen e Andriy Yermakut, shefit me ndikim të stafit të Zelenskyt, vetëm disa orë pasi Byroja Kundër Korrupsionit dhe Zyra e Prokurorit të vendit kryen kontrolle në zyrën e tij. Bastisjet ishin pjesë e hetimeve për një skandal korruptiv lidhur me dyshimet për përvetësimin e dhjetëra milionë dollarëve të destinuar për infrastrukturën energjetike të Ukrainës. Disa persona me ndikim të lidhur me Zelenskyn janë implikuar në këtë skemë, megjithëse vetë presidenti nuk është përfshirë drejtpërdrejt.
Yermak nuk është akuzuar drejtpërdrejt për ndonjë shkelje dhe gjatë bastisjeve deklaroi se hetuesve u ishte dhënë “qasje e plotë” në apartamentin e tij, duke shtuar se ai po bashkëpunonte me autoritetet.
“Pa humbur asnjë ditë”
Përpjekjet diplomatike zhvillohen gjithashtu në kohën kur Rusia ka nisur një seri sulmesh të mëdha ajrore kundër Kievit dhe rajoneve të tjera të Ukrainës, duke lënë qindra mijëra njerëz pa energji elektrike në të gjithë vendin, ndërsa temperaturat kanë filluar të bien ndjeshëm. Sulmet lanë të vdekur të paktën tre persona dhe plagosën dhjetëra të tjerë, duke shtyrë Zelenskyn të përsërisë thirrjen për armë shtesë mbrojtëse për të siguruar mbrojtjen e qyteteve ukrainase.
“Duhet të punojmë pa humbur asnjë ditë për të siguruar që të ketë mjaftueshëm raketa për sistemet tona të mbrojtjes ajrore dhe që gjithçka e nevojshme për mbrojtjen tonë dhe për presion ndaj Rusisë të jetë në vend,” tha ai.
Ukraina ka goditur objektiva brenda Rusisë, të cilët, sipas Kievit, përdoren për të mbështetur përpjekjet e luftës së Kremlinit. Ushtria ukrainase njoftoi se ka goditur rafinerinë e naftës Afipski në rajonin Krasnodar të Rusisë herët më 29 nëntor, si dhe uzinën e aviacionit ushtarak Beriev në rajonin e Rostovit.
Ndërkohë, burime i thanë Shërbimit ukrainas të Radios Evropa e lirë se dy cisterna të së ashtuquajturës “flota në hije” – Kairo dhe Virat – të përdorura nga Rusia për të eksportuar naftë duke shmangur sanksionet perëndimore, u sulmuan me dronë detarë në Detin e Zi. “Dronët detarë të modernizuar Sea Baby u përdorën me sukses ndaj anijeve,” tha burimi, i cili kërkoi të mos identifikohej pasi nuk ishte i autorizuar për të folur publikisht për këtë operacion.