Mbështetësit e Maduros protestojnë në Karakas kundër kërcënimeve të SHBA-së: “Ne jemi një vend i lirë, nuk duam luftë”
Qindra mbështetës të qeverisë së Nicolas Maduro demonstruan në rrugët e Karakasit, duke kundërshtuar kërcënimet e Uashingtonit përpara takimit të Këshillit të Sigurisë Kombëtare të Presidentit të SHBA-së, Donald Trump, për Venezuelën.
Me qëllimin e deklaruar për të luftuar kartelet e drogës, Shtetet e Bashkuara kanë vendosur një prani të fortë ushtarake në Karaibe për muaj të tërë, duke përfshirë edhe aeroplanmbajtësen më të madhe dhe më të përparuar në botë, USS Gerald R. Ford.
Të dielën, Donald Trump konfirmoi se javën e kaluar kishte folur në telefon me Presidentin Venezuelan Nicolas Maduro. Maduro beson se Uashingtoni po përdor goditjen ndaj trafikut të drogës si pretekst “për të imponuar ndryshimin e regjimit” në Venezuelë dhe për të sekuestruar rezervat e mëdha të naftës në vend.
“Ne jemi një vend i lirë, nuk duam luftë, duam paqe!” tha për AFP-në Narciso Torrealba, 68 vjeç. “Jemi të gatshëm për dialog me këdo që duhet të flasim, por nuk do të heqim dorë kurrë nga sovraniteti ynë kombëtar, nuk do ta shesim kurrë atdheun tonë”, shtoi Cirilo Cazorla, 54 vjeç.
Që nga fillimi i shtatorit, forcat amerikane kanë nisur sulme ajrore në Karaibe dhe Paqësor kundër anijeve të dyshuara për kontrabandë droge. Më shumë se 20 anije janë shkatërruar deri më sot, me të paktën 83 persona të vrarë. Këto akte janë cilësuar si “vrasje jashtëgjyqësore” nga OKB-ja.
Të shtunën, Trump deklaroi se e konsideronte hapësirën ajrore të Venezuelës “të mbyllur”, një mesazh që çoi në anulimin e fluturimeve nga të paktën gjashtë linja ajrore. Në shenjë hakmarrjeje, Maduro revokoi licencat e operimit të këtyre linjave ajrore në vend.
“Ne po luftojmë për mbrojtjen e vendit tonë, mbrojtjen e sovranitetit tonë kombëtar, mbrojtjen e burimeve tona”, tha zëvendëspresidentja e Venezuelës, Delcy Rodriguez, në televizionin shtetëror gjatë demonstratës.
Pavarësisht “kërcënimeve të tyre, strategjive të tyre idiote të luftës psikologjike (…) gënjeshtrave dhe shpifjeve të tyre, ne do të vazhdojmë (luftën) në rrugë” për të mbrojtur atdheun, theksoi presidenti i Dhomës, Jorge Rodriguez.