VIDEO EKSKLUZIVE e ekzekutimit në Elbasan: Dyshimet mbi vrasjen për borxhe të pashlyera
Lapsi.al ka siguruar pamjet filmike të atentatit ku u ekzekutua biznesmeni 43-vjeçar Edmond Mëhalla, të dielën në mbrëmje në qytetin e Elbasanit. Videoja tregon momentin kur autori, i mbuluar me kapuç për t’iu shmangur identifikimit nga kamerat e sigurisë, afrohet pranë makinës së viktimës dhe e qëllon disa herë.
Ngjarja ndodhi rreth orës 20:35, në lagjen “Emin Matraxhiu”. Viktima, sapo kishte dalë nga zyra dhe sapo ishte futur në automjetin e tij “Range Rover”, u qëllua me 6 plumba, dy prej të cilëve në kokë, çka i shkaktoi vdekjen e menjëhershme. Policia raporton se, pasi u sigurua se viktima kishte vdekur, autori u largua me një makinë “Audi” të zezë në drejtim të rrugës Elbasan–Librazhd. Automjeti, i marrë me qira, u gjet të nesërmen i djegur në fshatin Mirakë. Autori i krimit mbetet ende i paidentifikuar.
Arrestimet dhe personat e shpallur në kërkim:
- Hetimet kanë çuar në arrestimin e Xhino Agos, ish-ortak i viktimës, banues në Elbasan. Ai dyshohet si bashkëpunëtor në krim dhe akuzohet për veprat penale “Vrasje me paramendim, kryer në bashkëpunim” dhe “Prodhimi dhe mbajtja pa leje e armëve, armëve shpërthyese dhe municionit”. Ai dyshohet se i ka dhënë autorit makinën e përdorur në krim.
- Në pranga është vënë edhe Kujtim Pisha, 52 vjeç, roje në një karburant, i akuzuar për “moskallëzim krimi”.
- Autoritetet kanë shpallur në kërkim dy persona:
- Marselo Arani, 32 vjeç, banues në Elbasan, i cili ndodhej nën masën e sigurisë “arrest në shtëpi” për një tjetër vepër penale.
- Armando Kola, 35 vjeç, banues në Laç, i dyshuar për veprat “Vrasje me paramendim, kryer në bashkëpunim”, “Prodhimi dhe mbajtja pa leje e armëve” dhe “Largimi i të burgosurit nga vendi i qëndrimit”.
- Një tjetër bashkëpunëtor në ngjarje, Nevzat Spaho, 29 vjeç nga Prrenjasi, me precedentë penalë, është arrestuar këtë të mërkurë. Ai ka pranuar se makina e ortakut të viktimës iu ishte dhënë disa personave nga Lezha para ngjarjes.
Dyshimet: mosmarrëveshje për borxhe të pashlyera
Burime pranë hetimit sugjerojnë se viktima dhe personat e dyshuar si autorë njiheshin mes tyre. Dyshohet se Mëhalla kishte pasur konflikte të zgjatura me disa prej tyre lidhur me borxhe të pashlyera, dhëna me fajde, dhe se tensionet kishin agravuar prej muajsh. Sipas të njëjtave burime, viktima kishte ushtruar presion dhe më herët kishte pasur konflikte verbale e fizike me disa prej personave të përfshirë, çka mund të ketë kontribuar në atentat.
Vrasja dyshohet të jetë kryer në kushtet e një hakmarrjeje të menjëhershme, pas një konflikti të përshkallëzuar. Sidoqoftë, rolet e secilit prej personave të arrestuar dhe të kërkuar mbeten për t’u përcaktuar nga policia dhe hetimi do të sqarojë autorësinë e secilit.
Ndërkohë, Rolando Gjoni, banues në Lezhë, i cili kishte pasur në përdorim një nga automjetet e viktimës, është shoqëruar dhe marrë në pyetje. Pas dhënies së shpjegimeve, ai është lënë i lirë, pasi autoritetet nuk kanë konstatuar përfshirje të tij në krim.