Me kujdes kam analizuar titullin dhe përmbajtjen e artikullit.
**Titulli:** Takimi i Salianjit dhe Alimehmetit me demokratët në Durrës alarmon PD-në e Berishës, por fiton simpatinë e publikut
Ish-deputeti demokrat Ervin Salianji, gjatë një takimi me strukturat e PD në Durrës, theksoi se qytetarët përballen me një autokraci. Ai shtoi se shqiptarët thërrasin me dhimbje dhe se këto thirrje duhet të ngarkojnë me përgjegjësi çdo politikan. Ndërsa akuzoi Edi Ramën për shkatërrimin e vendit dhe për sjellje autokratike, Salianji nuk la pa kritikuar edhe Partinë Demokratike. Ai u shpreh se shqiptarët po largohen dhe se zgjedhjet janë kthyer në një arenë lufte, pjesërisht për shkak të paaftësisë së opozitës për të bindur qytetarët të votojnë.
“E kam ndjerë këtë thirrje. PD duhet të përgatitet të udhëheqë ndryshimin që të gjithë po presin. Ky ndryshim fillon edhe nga kjo sallë si takim i parë që po zhvillojmë me demokratët. Nga ky brez që i dëgjuat pak më parë, nga kjo energji e pashterrshme në PD por që nuk iu jepet mundësia për arsye që i dini. Shqipëria sot po plaçkitet. Shqipëria po shpopullohet, po plaket, sikur jeta e një kombi të kishte filluar numërimin mbrapsht. Edi Rama është autokrati që përfaqëson një grup njerëzish. 40 për qind e popullsisë është larguar. Kjo nuk është statistikë, është kambanë mortore për një komb. Shqiptarët janë krenaria jonë në çdo cep të globit. Kemi dëbuar fytyrën më të bukur të Shqipërisë, por ata nuk e kanë harruar vendin. E duan Shqipërinë dhe presin nga ne një gjë të thjeshtë, t’i japim së bashku arsye që të kthehen në Shqipëri. Sot është koha për të folur edhe për ne, demokratët. Edi Rama ka rrethuar votuesit. Përdor mjete të ndyra në politikë dhe ka prishur procesin politik në Shqipëri. Zgjedhjet janë si një luftë mes ndërvarësisë për bukën e gojës, shtrëngimin me vendin e punës, apo sipërmarrjen, zhvlerësimin e qytetarit të lirë apo krimit të organizuar. Duhet ta themim hapur dhe me sinqeritet, një tjetër shkak është paaftësia e opozitës, e PD si forca më e madhe opozitare në vend, për të qenë bindëse, për të nxjerrë shqiptarët drejt kutive të votimit, për t’i fituar zgjedhjet. Unë kam një thirrje sot për të gjithë shqiptarët. Bashkohuni me ne. Do ta mundim Edi Ramën bashkë, të hapur, të bashkuar, të ripërtërirë dhe do t’i sjellim Shqipërisë ndryshimin,”- tha Salianji.
Kreu i grupit parlamentar të PD-së, Gazment Bardhi, i ftuar në Euronews Albania, teksa Ervin Salianji zhvillonte takimin në Durrës, u shpreh se mbështet qëndrimin zyrtar të PD-së dhe të kryetarit Berisha, sipas të cilit çdo mbledhje jashtë forumeve është private. Duke iu përgjigjur pyetjes së gazetare Mirela Milori nëse kjo ndarje mund të shqetësonte bazën, Bardhi u shpreh se PD nuk pengon askënd të shprehë lirisht mendimin e tij apo të takohet me demokratët.
“Nuk ka lidhje intervista ime me ato që bën Salianji. Mbështes qëndrimin zyrtar të PD-së dhe të kryetarit Berisha, që ka thënë se: çdo mbledhje jashtë forumeve është private. PD nuk pengon askënd që të shprehë lirisht mendimin e tij apo të takohet me demokratët. PD ka institucione që nuk i kanë kufizuar të drejtën e fjalës askujt dhe nuk kanë për të penguar askënd të shprehë lirshëm mendimin. Sikurse takime me demokratë, secili prej anëtarëve të kryesisë së PD-së dhe kolegëve bën çdo ditë zgjedhjen e tij se këto takime do t’i bëjë publike apo do të marrë realisht mendimin e demokratëve,” tha Bardhi.
Duke u përgjigjur pyetjes nëse këto takime do të vazhdojnë dhe mund të tërheqin njerëz të pakënaqur, Bardhi shtoi se nuk ka keqkuptim me bazën dhe se Shqipëria ka shumë probleme më të rëndësishme që meritojnë vëmendje.
“Nuk ka keqkuptim te baza në raport me këto që po ndodhin në PD dhe Shqipëria ka shumë më shumë probleme që meritojnë kohë dhe vëmendje sesa kjo temë. Nuk shikoj asnjë problem të jem i vërtetë”, tha ai.
Alarm te PD Durrës
Takimi i paralajmëruar i Ervin Salianjit dhe Ilir Alimehmetit në Durrës duket se ka alarmuar edhe krerët lokalë të PD-së. Pas deklaratës së Berishës se takimi ishte për interesa personale, dy kryetarët e degëve në Durrës, Ard Muka dhe Osman Stafa, kanë dërguar një SMS automatik për rreth 5 mijë anëtarë, duke theksuar se Salianji dhe Alimehmeti janë persona të paautorizuar dhe se analiza do të bëhet brenda forumeve të partisë.
Një reagim i menjëhershëm ka ardhur nga një prej anëtarëve, i cili i kërkon dy krerëve lokalë të mos e kontaktojnë më në atë numër.
SMS automatik i krerëve të PD:
I nderuar anëtar i PD, dega Durrës!
Persona të paautorizuar kanë shpërndarë një njoftim për takim me strukturat tona. Ky njoftim nuk ka të bëjë as me Partinë Demokratike dhe as me agjendën e saj. Ai njoftim është fund e krye dezinformim.
Partia Demokratike sot ka në fokus të betejës së saj korrupsionin Rama–Balluku në Tunelin e Llogarasë dhe aferat e tjera korruptive të tyre. Ndërkohë jemi duke hyrë në procesin e brendshëm të analizës, gjithnjë vetëm brenda forumeve të Partisë.
Ndaj ne, si anëtarë të PD-së, distancohemi nga këto të ashtuquajtura takime të njoftuara për nesër, datë 3 Dhjetor.
Me respekt,
Kryetarët e degëve Durrës 1 dhe 2, Ard Muka dhe Osman Stafa
Përgjigjja e qytetarit:
Zotri mose mi bjeni më me këtë numër, jam larguar me kohë nga kjo parti që i thonë Berishizëm, ok.
Pjesëmarrja e lartë në takimin e parë të Ervin Salianjit dhe Ilir Alimehmetit në Durrës, është komentuar edhe nga kryeredaktori i Rilindjes Demokratike dhe anëtari i Këshillit Kombëtar të PD-së, Bledi Kasmi. Përmes një postimi në Facebook, ai u shpreh se nëse çdo deputet do të mblidhte 500 demokratë nëpër salla, perceptimi që opozitën nuk e ndjek askush nuk do të ishte i vërtetë.
“Nëse çdo drejtues i opozitës, çdo deputet do të mblidhte për të diskutuar dhe debatuar me bazën nga 500 demokratë, qytetarë, të rinj dhe të reja në takime, në zonat ku ka marrë mandatin, atëherë do të kishim një panoramë të ndryshme të opozitës sot, dhe të jeni të sigurtë që regjimi nuk do të mund të mbijetonte më shumë se disa javë. Ato prurje do të ktheheshin shumë shpejt në një ortek në Tiranë,” shkroi Kasmi.
Sipas tij, “Nëse kjo nuk ka ndodhur deri tani, atëherë çfarë po prisni, dhe nëse nuk e bëni dot, atëherë përse qëndroni aty ku jeni? Kujt i hyni në punë? Apo prisni si gjithmonë gjithçka nga Berisha dhe të ndani më pas llokmat. Dhe mos thoni më të paktën se nuk ka njerëz. Janë 520 mijë vota, 520 mijë frymë të gjalla kundër disa të vdekurve të gjallë!”
Juristi Kreshnik Spahiu deklaroi se me këtë lëvizje, Ervin Salianji do të shpallet tashmë armik nga Sali Berisha.
“Kjo tregon se demokratët mbështesin një diskurs tjetër të PD. Salianji do të pozicionohet kundër Berishës sepse Berisha do ta shpallë armik. Salianji duhet të kuptojë ku e ka forcën e tij. Salianji sot ka raporte të mira me liderët e partive të reja dhe ka mbështetjen e atyre strukturave që janë të reja dhe nuk janë konsumuar në të shkuarën me poste dhe me pushtet. Ai ka shumë antiberishistë dhe të ardhmen e tij nuk e shoh kryetar të PD, por duhet të ndërtojë profilin e liderit të opozitës së re të bashkuar me partitë e reja që i ka munguar Shqipërisë deri tani”, tha ai në një intervistë për Report TV.
Militanti nga Korça, Ilir Vrenozi, i njohur si mbështetës i Berishës, duket se e ka ‘tradhtuar’ kreun e PD-së dhe ka mbështetur lëvizjen e fundit të Ervin Salianjit. Në një video të postuar në rrjetet sociale, Vrenozi shprehet se zëri ndryshe e forcon partinë dhe se ka një përgëzim të madh për Ervin Salianjin, i cili, sipas Vrenozit, nuk ka pritur të vdesë Sali Berisha për t’i zënë vendin.
Po ashtu, demokrati korçar ka qenë i ashpër me ata që kanë filluar ta sulmojnë Salianjin si armik, duke u shprehur që të shkojnë e të qetësohen, pasi nuk janë ata demokratët që sulmojnë dikë që ka mendim ndryshe.