Meloni: Nëse Evropa dëshiron të jetë ‘e madhe’, duhet të mbrojë veten
Kryeministrja italiane, Giorgia Meloni, në një intervistë për mediat italiane, ka diskutuar rreth konflikteve globale dhe marrëdhënieve me Shtetet e Bashkuara. Ajo deklaroi: “Nëse Evropa dëshiron të jetë e madhe, duhet të jetë në gjendje të mbrojë veten. Kur ia dorëzon sigurinë dikujt tjetër, duhet të jesh i vetëdijshëm se ka një çmim për të paguar. Ajo që ndodhi në samitin e NATO-s nuk më habiti aspak. Ne e dimë se ky është një proces i pashmangshëm dhe një mundësi për ne. Është e qartë se mbrojtja ka një kosto ekonomike, por gjeneron liri politike”, tha Meloni.
Lidhur me luftën në Ukrainë, ajo theksoi se qëndrimi i qeverisë italiane mbetet i pandryshuar. “Ne e mbështetëm Ukrainën për të ndërtuar paqen. Paqja nuk ndërtohet vetëm me qëllime të mira, por edhe me frenim. Nëse nuk do ta kishim mbështetur Ukrainën, do të kishim pasur një komb të pushtuar dhe do të paguanim një çmim. Sot, negociatat po zhvillohen falë përpjekjeve tona mbështetëse. Prandaj, qëndrimi i qeverisë duhet të mbetet i njëjtë, sepse ne duam të ndërtojmë paqen. Italia ka arritur të mbajë një qëndrim serioz dhe të fortë për këtë çështje falë një shumice të bashkuar”, nënvizoi ndër të tjera Meloni.