Meloni me deklarata në stilin e Trump: Evropa, për të qenë “e madhe”, duhet të mbrohet vetë
Kryeministrja italiane, Giorgia Meloni, ka komentuar konfliktet aktuale në botë dhe marrëdhëniet me Shtetet e Bashkuara. Në një intervistë për mediat italiane, Meloni theksoi se nëse Evropa dëshiron të ruajë statusin e saj si një fuqi e madhe, ajo duhet të jetë në gjendje të mbrohet vetë.
Lidhur me luftën në Ukrainë, Meloni konfirmoi se qëndrimi i qeverisë italiane mbetet i pandryshuar. Ajo shtoi se paqja nuk arrihet thjesht me synime të mira, por kërkon edhe veprime parandaluese dhe forcim.
“Nëse Evropa dëshiron të jetë e madhe, duhet të jetë në gjendje të mbrojë veten,” deklaroi Meloni. “Kur ia delegoni sigurinë dikujt tjetër, duhet të jeni të vetëdijshëm se ka një çmim për t’u paguar. Ajo që ndodhi në samitin e NATO-s nuk më habiti aspak; e kuptojmë që është një proces i pashmangshëm dhe një mundësi për ne.”
Ajo vijoi duke shpjeguar se “mbrojtja ka një kosto ekonomike, por gjeneron liri politike. Ne e mbështetëm Ukrainën për të ndërtuar paqen. Paqja nuk ndërtohet me qëllime të mira, por me veprime parandaluese. Nëse nuk do ta kishim mbështetur Ukrainën, do të kishim pasur një komb të pushtuar dhe do të paguanim një çmim të lartë. Sot, negociatat po zhvillohen falë përpjekjeve tona mbështetëse. Prandaj, qëndrimi i qeverisë duhet të mbetet i njëjtë, sepse ne duam të ndërtojmë paqen.”
“Italia ka qenë në gjendje të mbajë një qëndrim serioz dhe të fortë në këtë çështje falë një shumice të bashkuar,” përfundoi Meloni.