Zbardhet plani: Polonia synon të këmbejë avionët sovjetikë me dronët ukrainas
Polonia ka planifikuar t’i dhurojë Ukrainës avionët luftarakë të epokës sovjetike, MiG-29, në këmbim të teknologjisë për dronë. Ky lajm u bë i ditur nga Ministria e Mbrojtjes më 10 dhjetor.
Polonia ka përfunduar zëvendësimin e avionëve të saj të vjetër sovjetikë me avionë më modernë: F-16 të prodhuar në Amerikë dhe FA-50 të prodhuar në Korenë e Jugut. Për më tepër, Polonia pret dorëzimin e 32 avionëve F-35 të porositur nga Shtetet e Bashkuara.
“MiG-ët po arrijnë fundin e periudhës së tyre të shërbimit, çka do të thotë se do të tërhiqen nga ushtria polake. Ne po diskutojmë për transferimin e tyre te pala ukrainase,” tha ministri i Mbrojtjes, Wladyslaw Kosiniak-Kamysz, në një intervistë për radion publike polake, Trojka.
Sipas Kosiniak-Kamysz, ky këmbim mund të përfshijë edhe “transferimin e teknologjive, për shembull në fushën e dronëve dhe raketave nga Ukraina në Poloni”.
Polonia, e cila i ka dhënë Ukrainës një numër të konsiderueshëm të avionëve të saj MiG-29 që nga fillimi i pushtimit rus, ende disponon 14 avionë të tillë, sipas raporteve të mediave.
“Bisedimet po vazhdojnë dhe jemi të vendosur t’i finalizojmë sa më shpejt të jetë e mundur,” theksoi Kosiniak-Kamysz. Ai shtoi se Polonia po përfiton tashmë nga ekspertiza ukrainase në fushën e trajnimit ushtarak për dronë.
“Ukrainasit janë më të mirët në fushën e dronëve midis të gjitha vendeve me të cilat kemi marrëdhënie të mira.”
Polonia, si anëtare e Bashkimit Evropian dhe NATO-s, është një nga mbështetëset më të forta të Ukrainës, duke shërbyer si një qendër kyçe për dërgesat ushtarake dhe humanitare drejt Kievit. /REL