Trump paralajmëron “luftë tokësore” kundër drogës në Amerikën Latine
Presidenti Donald Trump njoftoi të premten synimin e Uashingtonit për të nisur operacione ushtarake tokësore kundër rrjeteve të trafikimit të drogës në Amerikën Latine, duke theksuar se koha dhe vendi i sulmeve nuk janë përcaktuar ende.
Duke folur nga Zyra Ovale, Trump deklaroi se Shtetet e Bashkuara po hyjnë në një fazë të re të fushatës së tyre ushtarake kundër drogës, pas operacioneve të kryera tashmë në det. Ai tha për gazetarët: “Ne neutralizuam 96% të drogës që vinte nga deti dhe tani po fillojmë nga toka. Dhe nga toka është shumë më e lehtë, dhe kjo do të fillojë të ndodhë.”
Presidenti amerikan ka theksuar vazhdimisht një zgjerim të operacioneve ditët e fundit, të cilat vijnë pas një serie sulmesh të Pentagonit ndaj anijeve, që sipas forcave të armatosura amerikane, po përdoreshin për të transportuar drogë në ujërat ndërkombëtare pranë brigjeve të Amerikës së Jugut.
Edhe pse retorika e Shtëpisë së Bardhë është interpretuar kryesisht si një përpjekje për të ushtruar presion mbi Presidentin Venezuelan Nicolas Maduro, Donald Trump ka argumentuar se sulmet e mundshme tokësore nuk do të kufizohen domosdoshmërisht në atë vend. “Nuk është e thënë domosdoshmërisht të jenë në tokën venezueliane,” tha ai, duke shtuar se shënjestra janë “njerëzit e tmerrshëm që sjellin drogë në vendin tonë.”
Trump justifikoi lëvizjet e tij duke krahasuar luftën kundër trafikimit të drogës me operacionet e luftës. Ai theksoi se nëse vdekjet nga mbidoza do të regjistroheshin si viktima në luftë, “do të ishte një luftë si asnjë tjetër.”
Më herët gjatë javës, Presidenti Venezuelan Nicolas Maduro kishte paralajmëruar se në rast të një sulmi të huaj, klasa punëtore duhet të angazhohet në një “grevë të përgjithshme kryengritëse” dhe të kërkojë “një revolucion edhe më radikal,” duke përshkallëzuar më tej konfliktin.