Bota në pritje të zbatimit të planit të paqes së Trump; Rusia: Kemi marrë nën kontroll qytetin Kupyansk
Rusia deklaroi të hënën se kishte marrë “kontrollin” e Kupyanskut, një qytet kyç në verilindje të Ukrainës. Kjo vjen pasi forcat ukrainase njoftuan së fundmi se kishin rimarrë disa rrethe nga ushtria ruse.
“Qyteti i Kupyanskut është nën kontrollin e Korpusit të 6-të të ushtrisë ruse”, tha Leonid Sarov, një zëdhënës i njësisë ushtarake ruse Zapad, e cila është e vendosur në zonë.
Njoftimi u bë ndërkohë që Presidenti ukrainas Volodymyr Zelensky shprehu kënaqësi për “përparimin” në negociatat me SHBA-në për t’i dhënë fund luftës me Rusinë. Nga ana tjetër, europianët kanë promovuar një propozim për një forcë shumëkombëshe për të garantuar paqen në Ukrainë.
Rusia kishte pushtuar Kupyanskun në nëntor, ndërsa Ukraina më vonë tha se kishte rimarrë disa distrikte.
Sarov pohoi se “grupe të vogla” ushtarësh ukrainas po përpiqeshin “çdo ditë” të infiltronin në Kupyansk, duke këmbëngulur se “të gjitha distriktet janë nën kontrollin e forcave ruse”.
Zelensky vizitoi të premten trupat në rajonin e Kupyansk, në një video të publikuar pasi Kievi njoftoi rimarrjen e dy komuniteteve aty pranë dhe disa lagjeve të qytetit. Vizita e tij erdhi menjëherë pasi forcat ukrainase njoftuan “zhvillime të rëndësishme” në rajonin e Kupyansk, një qendër kryesore hekurudhore në rajonin e Kharkiv.
Ushtria ruse nisi ofensivën e saj të gjerë në Ukrainë në shkurt të vitit 2022 dhe aktualisht pushton 20% të territorit të vendit fqinj, kryesisht në lindje dhe jug, duke përfshirë disa zona të rajonit të Kharkiv.