Nënshkruhet marrëveshje për lehtësimin e procedurave doganore mes Shqipërisë dhe Greqisë
Dogana Shqiptare dhe Dogana Greke kanë nënshkruar një Marrëveshje për krijimin e korridoreve të gjelbra. Kjo marrëveshje synon të lehtësojë lëvizjen e mallrave dhe të përshpejtojë procedurat doganore në pikat kufitare mes dy vendeve.
Memorandumi i Mirëkuptimit u nënshkrua në Bruksel. Nga ana e Shqipërisë, atë e firmosi Drejtori i Përgjithshëm i Doganave të Republikës së Shqipërisë, z. Genti Gazheli. Ndërsa nga pala greke, marrëveshjen e nënshkroi Guvernatori i Autoritetit të Pavarur për të Ardhurat Publike (IAPR) të Republikës Greke, z. Georgios Pitsilis.
Ceremonia e nënshkrimit u organizua nga Komisionerja për Zgjerim, znj. Marta Kos. Ajo mblodhi drejtues të lartë të autoriteteve doganore, si dhe Drejtorin e CEFTA-s dhe Drejtorin e Komunitetit të Transportit.
Ky Memorandum bën pjesë e Iniciativës “Green Lanes”. Qëllimi i kësaj iniciative është thjeshtimi dhe përshpejtimi i kontrolleve kufitare. Gjithashtu, ajo synon reduktimin e kohës së pritjes dhe lehtësimin e flukseve tregtare mes Bashkimit Evropian dhe vendeve partnere të Ballkanit Perëndimor. Kjo arrihet nëpërmjet rritjes së koordinimit dhe shkëmbimit të të dhënave mes administratave doganore.
Gjatë eventit, Komisionerja për Zgjerimin, znj. Marta Kos, nënvizoi rëndësinë e forcimit të bashkëpunimit doganor. Ky bashkëpunim mbështet integrimin rajonal, lehtëson tregtinë dhe rrit qëndrueshmërinë ekonomike.
Kjo marrëveshje përfaqëson një hap konkret drejt modernizimit të bashkëpunimit doganor dhe përshpejtimit të procedurave kufitare. Ajo është në përputhje me standardet evropiane dhe objektivat e procesit të integrimit në Bashkimin Europian.