ISIS nuk i ndahet Sydneyt: Një tjetër sulm terrorist po përgatitej në Bondi Beach, 7 persona të arrestuar.
Autoritetet australiane vijojnë të jenë në gatishmëri të lartë pas sulmit terrorist në Bondi Beach, ku humbën jetën 16 persona, përfshirë një nga dy personat e armatosur.
Ndërkohë, policia njoftoi se ka parandaluar në minutën e fundit një tjetër sulm të mundshëm. Sipas mediave lokale, policia ndërhyri pas marrjes së informacioneve të besueshme, duke bastisur një automjet në të cilin ndodheshin disa burra që dyshohet se po planifikonin akte dhune në plazhin Bondi.
Gjatë operacionit u arrestuan shtatë persona. Pamjet filmike të publikuara tregojnë oficerë të njësive kundër terrorizmit, të veshur me uniforma kamuflazh, teksa prangosin të dyshuarit, të cilët besohet se ishin nisur drejt plazhit të famshëm.
Raportohet se policia përdori një automjet tip Land Cruiser për t’u përplasur me një Hyundai të bardhë që transportonte disa prej të arrestuarve. Të dyshuarit u neutralizuan dhe u arrestuan në një kryqëzim në qytetin e Liverpoolit, ku u panë të shtrirë në tokë me pranga.
Mediat raportojnë se Policia e Uellsit të Ri Jugor kishte marrë informacion se këta individë po planifikonin të shkonin në Bondi Beach pas një udhëtimi nga Melbourne.