Reuters: Putin synon të pushtojë të gjithë Ukrainën dhe të rimarrë pjesë të Evropës
Gjashtë burime pranë Reuters kanë deklaruar se Drejtoria Qendrore e Inteligjencës (CIA) vazhdon të paralajmërojë se Presidenti rus Vladimir Putin ka si synim pushtimin e të gjithë Ukrainës dhe rimarrjen e rajoneve evropiane që i përkisnin ish-Bashkimit Sovjetik.
Sipas njërit prej burimeve, raporti më i fundit daton në fund të shtatorit dhe është në kundërshtim të plotë me qëndrimin e paraqitur nga Presidenti i SHBA-së, Donald Trump, dhe negociatorët amerikanë. Ata kanë deklaruar se Putin dëshiron t’i japë fund konfliktit në Ukrainë.
Ky informacion gjithashtu hedh poshtë pretendimet e Putinit se ai nuk përbën kërcënim për Evropën. Përkundrazi, raportet e CIA-s përputhen kryesisht me vlerësimet e udhëheqësve evropianë dhe agjencive të inteligjencës evropiane, të cilët mendojnë se Rusia synon të pushtojë të gjithë Ukrainën dhe territoret e ish-shteteve të bllokut sovjetik, duke përfshirë edhe anëtarë të aleancës së NATO-s, sipas këtyre burimeve.
“Informacionet e inteligjencës kanë qenë gjithmonë se Putini dëshiron më shumë. Evropianët e besojnë fuqimisht këtë. Polakët janë absolutisht të bindur. Vendet baltike besojnë se do të jenë të parat,” ka thënë në një intervistë për Reuters, Mike Quigley, anëtar demokrat i Komitetit të Inteligjencës së Dhomës së Përfaqësuesve.
Rusia aktualisht kontrollon rreth 20% të territorit ukrainas, duke përfshirë pjesën më të madhe të rajoneve Luhansk dhe Donetsk, të cilat formojnë zemrën industriale të Donbasit, pjesë të rajoneve Zaporizhzhia dhe Kherson, si dhe Krimenë, gadishullin me rëndësi strategjike në Detin e Zi.
Putin pretendon se Krimea dhe katër provinca të tjera i përkasin Rusisë.
Trump po i bën presion Kievit që të tërheqë forcat e tij nga pjesa e vogël e Donetskut që ende e kontrollon, si pjesë e një marrëveshjeje paqeje të propozuar. Kjo kërkesë, sipas dy burimeve të njohura me çështjen, refuzohet nga Presidenti ukrainas Volodymyr Zelensky dhe shumica e ukrainasve.
“Ekipi i presidentit ka bërë përparim të jashtëzakonshëm në përfundimin e luftës dhe Trump ka thënë se një marrëveshje paqeje është më afër se kurrë,” ka deklaruar një zyrtar i Shtëpisë së Bardhë, duke mos komentuar mbi raportet e inteligjencës, siç raporton Reuters.