Nga Gjermania në Mbretërinë e Bashkuar: Tregjet me të cilat mund të punojnë kontabilistët shqiptarë
Firmat shqiptare kanë tashmë përvojë reale me klientë ndërkombëtarë në fusha të tilla si përputhshmëria ligjore, kontabiliteti bazë, raportimi financiar dhe mbështetja administrative. Kjo tregon se eksporti i shërbimeve kontabël nuk është vetëm një ide teorike, por një praktikë që ka nisur të marrë formë.
Një vlerësim i detajuar i 168 profesionistëve dhe subjekteve të sektorit, përfshirë kontabilistë individualë dhe firma të vogla e të mesme kontabël dhe auditues, ka nxjerrë në pah një tablo më pozitive se sa perceptimi i zakonshëm për kapacitetet e Shqipërisë në eksportin e shërbimeve kontabël. Analiza ka treguar se njohuritë teknike të profesionistëve shqiptarë janë solide dhe në përputhje me standardet ndërkombëtare si IFRS, ISA dhe IPSAS, duke përbërë një bazë të rëndësishme për ofrimin e shërbimeve jashtë vendit.
Kjo analizë u krye në kuadër të një programi të specializuar zhvillimi profesional dhe promovimi ndërkombëtar, me synimin që Shqipëria të bëhet një ofrues rajonal i shërbimeve kontabël për tregjet e BE-së. Programi mbështetet nga Qeveria e Zvicrës përmes SECO dhe nga asistenca teknike e Bankës Botërore.
Një avantazh i dukshëm lidhet me njohjen e shumë gjuhëve. Anglishtja dhe italishtja janë gjuhët më të përdorura nga profesionistët shqiptarë, duke e bërë sektorin veçanërisht të përshtatshëm për tregje si Italia, Mbretëria e Bashkuar dhe Gjermania. Kjo aftësi gjuhësore, e kombinuar me kosto konkurruese dhe fleksibilitet organizativ, krijon kushte të favorshme për ofrimin e shërbimeve kontabël dhe financiare në distancë.
Vlerësimi ka treguar gjithashtu se interesi për ndërkombëtarizim është konkret. Një grup prej 36 subjektesh shprehu gatishmëri të menjëhershme për të eksportuar shërbime, ndërsa 74 të tjera u vlerësuan me potencial të lartë për të hyrë në tregjet e BE-së pas forcimit të kapaciteteve teknologjike dhe organizative.
Këto gjetje konfirmojnë se profesioni kontabël në Shqipëri, megjithëse i fragmentuar dhe i dominuar nga struktura të vogla, ka disa avantazhe konkurruese thelbësore:
- Cilësi teknike të qëndrueshme
- Kosto efektive
- Fleksibilitet operacional
- Stabilitet relativ i stafit
“Nga përvoja ime profesionale, është thelbësore të jesh në gjendje të demonstrosh kapacitet dhe aftësi konkrete, dhe kjo duhet të bëhet fillimisht në tregun vendas. Duhet të jesh në gjendje të provosh çfarë bën. Vetëm pasi kjo të jetë konsoliduar, duhet ndjekur një qasje e synuar, për shembull duke iu drejtuar institucioneve shumëpalëshe ose korporatave shumëkombëshe që kanë aktivitet në Shqipëri, aty ku ka kuptim që partnerët ndërkombëtarë të bashkëpunojnë me ty. Prej andej ndërtohet më tej. Kjo ka qenë përvoja ime profesionale: është e mundur dhe, kur krijohen dy apo tre marrëdhënie dhe programe afatgjata, krijohet momentum. Shpesh është befasuese se sa shpejt përshpejtohet rritja,” thotë Sean Sweeney, ekspert irlandez, i angazhuar në zbatimin e projektit për rritjen e kapacitetit të eksportit të shërbimeve të kontabilitetit në Shqipëri.
Boshllëqet kryesore: teknologjia, integrimi dhe siguria e të dhënave
Në të njëjtën kohë, vlerësimi evidentoi qartë edhe boshllëqet që duhet të adresohen për një hyrje të qëndrueshme në tregjet europiane. Mungesat kryesore lidhen me nivelin e digjitalizimit, përdorimin e platformave cloud dhe aftësinë për t’u integruar pa pengesa me sistemet e klientëve të huaj. Po ashtu, standardet e privatësisë dhe sigurisë së të dhënave, përfshirë përputhjen me GDPR dhe certifikime si ISO 27001, mbeten një sfidë për një pjesë të konsiderueshme të firmave.
Një tjetër element kritik është menaxhimi i kapaciteteve dhe i burimeve njerëzore, veçanërisht në kushtet kur kërkesat nga klientët ndërkombëtarë kërkojnë qëndrueshmëri, respektim të afateve dhe cilësi të njëtrajtshme shërbimi. Marketingu ndërkombëtar dhe ndërtimi i besueshmërisë në tregje të reja janë gjithashtu fusha ku firmat shqiptare kanë nevojë për mbështetje dhe orientim strategjik.
Për të adresuar këto boshllëqe, projekti ndërmori një seri trajnimesh të specializuara, që përfshinë automatizimin e proceseve, analitikën financiare, përdorimin e mjeteve teknologjike, si dhe zhvillimin e aftësive të buta, të tilla si komunikimi me klientë ndërkombëtarë, menaxhimi i projekteve dhe negociatat profesionale. Qëllimi ishte jo vetëm përmirësimi teknik, por edhe përgatitja e firmave për të operuar sipas standardeve dhe pritshmërive të tregjeve të BE-së.
Marketing dhe pozicionim ndërkombëtar: një qasje e strukturuar drejt tregjeve të BE-së
Bazuar në analizën e tregut dhe në kapacitetet ekzistuese, u identifikuan disa tregje prioritare për eksportin e shërbimeve kontabël shqiptare:
- Italia: shihet si tregu më natyror për shkak të afërsisë gjeografike, lidhjeve gjuhësore dhe kërkesës së lartë për shërbime mbështetëse.
- Mbretëria e Bashkuar: paraqet një treg të pjekur për outsourcing dhe shërbime të specializuara.
- Gjermania: ofron mundësi konkrete për shkak të mungesës së fuqisë punëtore dhe nevojës për shërbime back-office.
- Franca: po shfaq rritje të kërkesës për shërbime të standardizuara dhe me kosto efektive.
Plani i marketingut parashikon një qasje graduale dhe realiste: forcim të kapaciteteve brenda vendit, ndërtim të rrjeteve të partneritetit në BE, pjesëmarrje të synuar në aktivitete dhe evente ndërkombëtare, si dhe krijimin e një identiteti profesional të unifikuar për shërbimet kontabël shqiptare. Kjo qasje synon ta pozicionojë Shqipërinë jo si një ofrues të rastësishëm, por si një partner të besueshëm dhe konkurrues në tregjet europiane të shërbimeve profesionale.