“Nëse ekzekutoni protestuesit, do të ndërhyjmë!” / SHBA gati të sulmojë Iranin? Baza ushtarake në Katar, më e madhja në Lindjen e Mesme, po zbrazet.
Ndërsa presidenti amerikan Donald Trump ka paralajmëruar se Shtetet e Bashkuara do të ndërhyjnë në Iran nëse e shohin të nevojshme, një zhvillim i fundit ka shtuar dyshimet se një sulm amerikan ndaj Iranit mund të ndodhë së shpejti.
Personeli i bazës ushtarake amerikane Al Udeid në Katar është urdhëruar të largohet deri të mërkurën në mbrëmje, sipas tre diplomatëve të cituar nga Reuters.
Ministri i Jashtëm i Iranit, Abbas Araqchi, ka paralajmëruar se vendi i tij do të mbrohet nga “ndërhyrjet e liga dhe të huaja”. Më parë, Teherani kishte paralajmëruar se në rast ndërhyrjeje nga SHBA, do të sulmonte bazat ushtarake amerikane në rajon.
Përpara sulmeve të mundshme të SHBA-së ndaj Iranit në qershor, një pjesë e personelit ishte zhvendosur nga bazat amerikane në Lindjen e Mesme. Ndërkohë, të dhënat e gjurmimit të fluturimeve nga FlightRadar24 tregojnë një rritje të aktivitetit operativ në Bazën Ajrore Al Udeid, sipas raportimeve mediatike.
Shtetet e Bashkuara mbajnë një prani të konsiderueshme ushtarake në Lindjen e Mesme, duke përfshirë asete të shumta detare dhe baza të përhershme e të përkohshme në të paktën 19 vende të rajonit.
Trump ka qenë duke shqyrtuar nëse SHBA-të duhet të ndërhyjnë në Iran, ku po zhvillohen protestat dhe trazirat më intensive antiqeveritare në vite. Kohët e fundit, vendi është izoluar nga pjesa tjetër e botës, me internetin që ka pësuar ndërprerje për gati 100 orë dhe regjimin që ka ndërmarrë një shtypje brutale të protestave.
Numri i të vdekurve nga protestat në Iran ka arritur në 2,571, sipas grupit të të drejtave të njeriut me seli në SHBA, HRANA. Një grup tjetër i të drejtave të njeriut raportoi një numër të vdekurish prej gati 2,600, teksa regjimi teokratik përpiqet të shtypë protestat mbarëkombëtare, të cilat përbëjnë një nga sfidat më të mëdha për sundimin e tij që nga Revolucioni Islamik i vitit 1979.
Baza Al Udeid ndodhet rreth 35 kilometra në jugperëndim të Dohës, kryeqytetit të Katarit. Ajo strehon më shumë se 10,000 ushtarë amerikanë dhe është baza më e madhe amerikane në Lindjen e Mesme, me një pistë prej 4,500 metrash të aftë për të akomoduar avionë të mëdhenj ushtarakë, siç janë bombarduesit B-52 dhe avionët e transportit.