“`html
Kompensimi i naftës te Transporti Publik, Financat të gatshme për 3 muaj shtesë, pritet propozimi
Shtrenjtimi i çmimit të naftës po vështirëson koston e operimit për transportin publik privat dhe ka rikthyer debatin mes Ministrisë së Financave dhe asaj të Infrastrukturës dhe Energjisë (MIE).
Që prej muajit maj, shoqatat e transportit publik vijojnë të shprehin shqetësimin për mospërballimin e kostove nga shtrenjtimi i çmimit të naftës dhe për kohëzgjatjen e periudhës për të përfituar 50 lekë për litër kompensim.
Shoqata Kombëtare e Transportit Qytetas, vetëm gjatë muajit gusht, ka përsëritur dy herë kërkesën se kostoja e operimit mbetet e papërballueshme dhe se kjo situatë mund të sjellë reduktim të mjeteve të transportit për qytetarët.
Shtyrja e afatit të kompensimit të naftës për transportin ka shkaktuar sërish debat mes Ministrisë së Financave dhe asaj të Infrastrukturës dhe Energjisë.
Ministria e Financave i është përgjigjur kërkesës së Shoqatës Kombëtare të Transportit Qytetas për zgjatjen e afatit të kompensimit. Shoqata ka kërkuar që masa e përcaktuar në Vendimin e Këshillit të Ministrave nr. 341, datë 13.05.2026, të vijojë edhe për tre muaj, nga qershori deri në gusht 2026.
Ministria e Financave ia ka përcjellë kërkesën Ministrisë së Infrastrukturës dhe Energjisë për trajtim dhe vlerësim. Në shkresë thuhet se Ministria e Financave është e gatshme të shqyrtojë çdo propozim që mund të paraqitet nga Ministria e Infrastrukturës dhe Energjisë.
“Shoqata Kombëtare e Transportit Qytetas, me shkresën datë 06.08.2026, ka paraqitur kërkesën për zgjatjen e afatit të zbatimit të VKM-së nr. 341, datë 13.05.2026, “Për përcaktimin e procedurave, të dokumentacionit dhe të masës së kompensimit për shoqëritë e linjave të transportit qytetës, rrethqytetës dhe ndërqytetës në kushtet e situatës së veçantë në tregun hidrokarbur” edhe për një periudhë shtesë prej 3 (tre) muajsh (Qershor-Korrik-Gusht). Në vijim të sa më sipër, lutem trajtimin e kërkesës dhe vlerësimin e situatës brenda fushës së përgjegjësisë së Ministrisë së Infrastrukturës dhe Energjisë. Ministria e Financave shpreh gatishmërinë për të shqyrtuar çdo propozim që mund të paraqitet nga ana juaj,” theksohet në letrën e Ministrisë së Financave drejtuar Ministrisë së Infrastrukturës dhe Energjisë.
Kjo nuk është hera e parë që Ministria e Financave shpreh gatishmërinë për të shqyrtuar mundësinë për shtyrjen e afatit edhe me 3 muaj të kompensimit të naftës. Edhe në një shkresë të 21 Maj 2026, Ministria e Financave i ishte drejtuar Ministrisë së Infrastrukturës dhe Energjisë, duke kërkuar shqyrtimin e kërkesës brenda fushës së përgjegjësisë institucionale dhe duke shprehur gatishmërinë për të shqyrtuar çdo propozim.
Në komunikimin e fundit, më 20 Gusht 2026, mes ministrive, Ministria e Financave shpreh sërish gatishmërinë për shqyrtimin e çdo propozimi që do të paraqitet nga Ministria e Infrastrukturës, duke kërkuar në thelb propozime konkrete për shqyrtim.
Vendimi për dhënien e kompensimit në masën 50 lekë për litër, për një periudhë 3 mujore, më pak sesa u kërkua nga shoqatat e transportit, u miratua nga qeveria në mesin e muajit maj. Vendimi përcakton se kompensimi do të llogaritet mbi shumën e konsumit të karburantit për periudhën mars, prill, maj 2026, por jo më shumë se sasia e konsumuar për të njëjtën periudhë të vitit 2025, për secilën shoqëri.
Efektet financiare llogariten në vlerën e 250 milionë lekëve, ose rreth 2.6 milionë euro. Këto fonde do të përballohen 120 milionë lekë nga fondi rezervë i buxhetit të shtetit dhe 130 milionë lekë nga buxheti i Bashkisë së Tiranës.
Më 1 gusht përfundoi afati për aplikimet për subvencionimin e naftës për operatorët e transportit publik. Për shkak të rritjes së çmimit të naftës, të ndikuar edhe nga konflikti në Lindjen e Mesme, operatorët përfituan kompensim në masën 50 lekë për litër për naftën e periudhës mars-prill-maj.
Megjithatë, interesi për aplikim ka qenë i ulët. Sipas të dhënave të Shoqatës së Transportit Urban dhe Interurban, nga rreth 140 operatorë në të gjithë vendin (110 operatorë kryejnë aktivitet për linjat ndërqytetëse dhe 30 për transportin urban në Tiranë), vetëm 35 kanë dorëzuar aplikimin, pra rreth 25% e totalit.
Kryetari i Shoqatës së Transportit Urban dhe Interurban, Dashnor Memaj, ka deklaruar më parë se operatorët më të vegjël, të cilët disponojnë vetëm një ose dy mjete, nuk kanë mundur të aplikojnë për shkak të mungesës së dokumentacionit që provon shpenzimet për karburant.
“`