Ligji i ri sanksionon përmbajtjet online me gjoba ditore deri në 500 mijë lekë
Platformat dhe ofruesit e shërbimeve online do të përballen me gjoba që arrijnë deri në 500 mijë lekë për çdo 24 orë vonesë, nëse nuk veprojnë për të hequr përmbajtjet e dëmshme nga interneti. Ky është elementi kryesor i ligjit të ri, i cili synon të detyrojë këto subjekte të zbatojnë masat mbrojtëse.
Me një vendim të Këshillit të Ministrave, është përcaktuar mekanizmi administrativ që i akordon Autoritetit të Komunikimeve Elektronike dhe Postare (AKEP) kompetenca të drejtpërdrejta ndëshkuese ndaj atyre subjekteve që nuk zbatojnë vendimet gjyqësore për mbrojtjen e viktimave nga dhuna digjitale.
Sipas vendimit, AKEP do të shqiptojë gjoba administrative, duke filluar nga 30 mijë deri në 500 mijë lekë për çdo ditë vonesë, për ofruesit e shërbimeve online që nuk kryejnë heqjen, bllokimin ose fshirjen e përmbajtjes digjitale, të cilat janë përcaktuar si masa mbrojtëse nga gjykata. Këto përmbajtje përfshijnë, por nuk kufizohen në:
- Imazhe intime të publikuara pa pëlqimin e viktimës.
- Llogari apo fjalëkalime të përdorura për përndjekje.
- Profili apo lidhje elektronike të përdorura për ngacmim.
Gjobat e vendosura nga AKEP kanë fuqinë e titullit ekzekutiv dhe hyjnë në buxhetin e shtetit. Megjithatë, subjektet e gjobitura përfitojnë një ulje automatike prej 15% të shumës, nëse pagesa kryhet brenda 30 ditëve nga data e njoftimit të vendimit. Ndërkohë, ligji ofron të drejtën e ankimit në gjykatën administrative kompetente brenda 45 ditëve.
Përtej sanksioneve financiare, ligji zgjeron në mënyrë të konsiderueshme juridiksionin territorial të autoriteteve shqiptare. Masat mbrojtëse dhe administrative mund të zbatohen në territorin e Republikës së Shqipërisë, ndërsa AKEP dhe autoriteti rregullator i medias audiovizive kanë mundësinë të urdhërojnë heqjen, bllokimin ose kufizimin e përmbajtjes digjitale, pavarësisht vendndodhjes së serverit apo ofruesit të shërbimit.
Në situata të caktuara, gjykata civile mund të vendosë masa më të rrepta, siç është ndalimi i kontaktit online dhe offline, si dhe sekuestrimin e çdo mjeti digjital të përdorur për ushtrimin e dhunës, për sa kohë që këto mjete ndodhen brenda territorit shqiptar.
Procedurat, formatet e kërkesave dhe mënyra e njoftimit elektronik për zbatimin e këtyre masave do të miratohen me një vendim të përbashkët të Këshillit të Lartë Gjyqësor, autoritetit përgjegjës për drejtësinë dhe AKEP, me qëllim standardizimin dhe përshpejtimin e ndërhyrjeve në mjedisin digjital. (Burimi: Monitor.al)