“`html
AKSHI nuk ndalet, administrata mund të mbetet pa internet pas ankimimit të sërishëm të tenderit
Agjencia Kombëtare e Shoqërisë së Informacionit (AKSHI) përballet sërish me vonesa në procedurat e saj. Pas problemeve me sistemin e SelfCare të Tatimeve, këtë të enjte, Komisioni i Prokurimit Publik ka marrë në shqyrtim një ankesë për tenderin me vlerë 4.8 milionë euro, i cili synon ofrimin e shërbimit të internetit për AKSHI dhe institucione të tjera publike.
Ankesa është paraqitur nga njëri prej operatorëve pjesëmarrës në procedurë dhe ka të bëjë me mënyrën e vlerësimit të ofertave nga Komisioni i Vlerësimit të Ofertave. Nuk është hera e parë që ky tender has në probleme. Në dhjetor, i njëjti tender ishte pezulluar nga Komisioni i Prokurimit Publik për shkak të ankesave të mëparshme nga disa operatorë lidhur me dokumentacionin e procedurës. KPP-ja ka miratuar kërkesat e disa ankimuesve, ndërsa për të tjerë jo, duke parashtruar edhe arsyet përkatëse.
Këto ankesa të vazhdueshme kanë sjellë vonesa të konsiderueshme në lidhje me afatet e zakonshme të kontraktimit. Tenderi është hapur në datën 13 gusht 2025, ndërsa objekti i tij është “Shërbimi i internetit dhe intranetit për Agjencinë Kombëtare të Shoqërisë së Informacionit dhe institucionet publike”.
Fondi limit për këtë tender është 4.8 milionë euro dhe shërbimi parashikohet të ofrohet për një periudhë prej 730 ditësh. Sipas termave të referencës, qëllimi kryesor i kontratës është “instalimi dhe aktivizimi i shërbimit të Internetit dhe Intranetit për institucionet e administratës shtetërore nën përgjegjësinë e Këshillit të Ministrave”. Operatorët ekonomikë kanë përgjegjësinë e garantimit të disponueshmërisë së shërbimit në çdo kohë, duke ofruar mbështetje teknike dhe mirëmbajtje të linjave fizike sipas standardeve të përcaktuara (SLA).
Procedurat e lidhura me sistemet e IT dhe mirëmbajtjet janë ndër më të ankimuarat pranë Komisionit të Prokurimit Publik, duke shkaktuar shpesh vonesa të gjata. Një rast i ngjashëm ishte edhe ai i mirëmbajtjes së sistemit të fiskalizimit, i cili u ankimua disa herë dhe kishte një fond limit prej 7.7 milionë euro. Ky rast ka qenë ndër arsyet që çoi në mosfunksionimin e platformës self-care dhe bllokoi aktivitetin e bizneseve për rreth tre javë.
“`